Kandidato makareklamo apan…

CEBU, Philippines - Subling gipahinumdoman ang mga sakop sa media sa ilang kaakohan panahon sa eleksyon atol sa gihimong orientation sa Cebu-Citizens’ Involvement and Maturation in People’s Empowerment and Liberation (C-Cimpel).

Si Provincial Comelec Election Officer, Ferdinand Gujilde nagkanayon nga kinahanglan nga patas ang pagbalita ug kuhaan gyud og pamahayag ang pikas habig o ang hingtungdang kandidato.

Hinuon giangkon ni Gujilde nga di mahimong but-an ang media sa ilang isuwat nga balita, apan kinahanglan nga wa kini dapigan.

Sumala pa niya kung ang usa ka kandidato makabatyag nga naguba ang iyang reputasyon o ang ilang tsansa sa eleksiyon nakompormiso tungod sa news article pwede silang maka-invoke sa right to reply.

Apan ang media outlet gihapon ang magbuot sa paagi kun unsaon pagmantala ang ilang tubag.

Kinahanglan nga dokumentado ang ilang reklamo nga iduso ngadto sa media outlet ug sa Comelec.

Ang media outlet patubagon lang ug kung ang mireklamo dili matagbaw sa tubag pwede kining mopasaka og reklamo ngadto sa Comelec.

Apan giklaro ni Gujilde nga walay silot o penalty nga mapahamtang sa media outlet kung dili makontento ang usa ka kandidato sa tubag sa iyang reklamo.

Sa laing bahin, ang mga sakop sa media pwedeng makabotar sa laing lugar nga diin dili sila rehistrado pinaagi sa “local absentee voting” sama sa pamaagi sa pagbotar sa mga opisyal ug kawani sa gobiyerno lakip ang polis ug sundalo  nga idestino sa nagkadaiyang lugar panahon sa eleksyon.

Ang pag-file sa application form alang niini gikatakda sa Marso 7, 2016 ngadto sa buhatan sa election officer o sa election provincial supervisor nga suportahan og sertipikasyon sa ilang mga labaw nga dili sila makabotar atol sa adlaw sa eleksiyon tungod sa ilang trabaho.

Gitakda kini karong Abril 27-29 gikan sa alas 8:00 sa buntag hangtud sa alas 5:00 sa hapon apan kadto lang mga kandidato   sa pagka- presidente, bise presidente, senador ug party lists ang ilang mabotaran.

Samtang  kadto lamang accredited nga sakop sa media ang tugotang maka-cover sulod sa polling place ug canvassing venue.

Pweding makakuha og hulagway ug makakuha og video footage apan dili pweding mag-interview og botante, Board of Election Inspector ug dili pweding kuhaan og hulagway o footage ang balota nga napil-apan na sa botante.

Dugang ni Gujilde nga ang BEI makamando sa pagpadakop ni bisan kinsa basta kini nakahimo og kasamok o kalapasan atol sa pagpahigayon sa botasyon.  (BANAT NEWS)