Valentine’s Day angay ipasalamat

CEBU, Philippines - Angay nga magpasalamat ang katawhan nga adunay gitawag nga adlaw sa mga managhigugmaay sumala pa ni Cebu Archbishop Jose Palma.

Matud pa ni Palma, nindot kaayo ang gugma paminawon kun kini ipaambit ngadto sa pamilya, mga higala, ug uban.

Apan adunay mensahe si Palma alang sa kabataan nga karong panahona nagselebrar usab uban sa ilang mga pinili.

Matud pa niya nga samtang naghigugmaay, kinahanglan ilang himuong prayoridad ang ilang kaugmaon pinaagi sa pagtuon.

Sumala pa niya, ang kabatan-on maisip nga usa ka gasa gikan sa Kahitas-an ug sa maong pangidaron pandayon ang kaugmaon sa kabataan pinaagi sa paghimo sa hustong mga buhat ug nakapokus sa masanagong ugma.

Iyaha hinuong gitambagan ang kabataan nga mas labing maayo kun sila mosaulog sa okasyon uban sa ilang mga ginikanan, mga igsuon, pamilya ug sa kahigalaan.

Walay makatug-an kun kanus-a ug giunsa gyud pagsugod nganong aduna may Valentine’s Day nga giselebrar kada Pebrero 14.

Apan base sa www.History.Com adunay tulo ka mga estorya nga maoy gituohang posibleng sinugdanan niini.

 Ang usa mao ang Santos nga si Valentine nga matud pa usa ka martir. Usa siya ka pari niadtong ikatulong siglo sa Roma sa panahon ni Emperador Claudius II.

Ang emperador matud pa mipagawas og kamandoan nga mas mangtas ang mga sundalong walay mga asawa o hinigugma ug tungod niini gidili na ang pagminyo sa babaye ug lalaki.

Apan ang pari nga si Valentine miisip sa kamandoan nga usa ka inhustisya ug gisupak niya ang kamandoan ug padayon siyang nipahigayon og sekretong pagkasal sa managhigugmaay.

Hangtud nga nasakpan siya ug gimando ni Claudius nga siya ipapatay.

Laing estorya mao nga si Valentine gipapatay tungod sa iyang pagka-Kristiyano ug pagtabang niini sa mga kaparehas niya gipapriso sa Roma.

Sud sa bilanggoan sa wa pa siya ipapatay, iyang gisuwat ang kinaunahang “Valentine” greeting para sa iyang kaugalingon ug misuwat siya sa naibgan niyang babaye nga anak sa usa sa mga opisyal sa Roma nga gibutangan niya og “From your Valentine.” (BANAT NEWS)