Grupo ni Loy Madrigal nang-recruit

CEBU, Philippines - Imbestigaron sa Cebu Provincial Anti-Illegal Fishing Task Force (CPAIFTF) ang giingong pagpang-recruit og mga miyembro sa Guardian of the Sea diin gigamit ang pangan ni kanhi Capitol security chief Loy Madrigal.

Si Madrigal ang nagtukod sa Guardian of the Sea diin kasagaran nga mga miyembro mga mananagat sa amihanang bahin sa Probinsiya sa Sugbo.

Si Madrigal toa na karon sa Estados Unidos human nalambigit sa kontrobersiya sa Kapitolyo ug ang iya’ng grupo dili accredited sa probinsiya.

Atol sa Kapistorya sa Kapitolyo kagahapon, ang hepe sa CPAIFTF nga si Marcelo “Mar” Go nibutyag nga niadto’ng nilabay’ng adlaw nakadawat sila og report gikan sa Talisay City Agriculture Office nga adunay usa ka babaye nga nang-recruit sa mga mananagat.

Ang babaye giingong nigamit sa pangan ni Madrigal ug sa probinsiya aron makaagni sa mga mananagat.

Gibutyag ni Go nga ang maong babaye sukad pa sa nilabay’ng tuig nga gikatahong nang-recruit ug nakadawat usab sila og report nga ang Guardian of the Sea nagpahigayon og operasyon batok sa ilegal nga panagat ug nagpabayad og multa nga wala nasayud ang Kapitolyo.

Sa laing bahin, ang pantalan sa Hagnaya sa San Remigio ug Polambato sa Dakbayan sa Bogo ang gihimo’ng agianan sa mga isda nga kuha sa ilegal nga paagi.

Gibutyag ni Go nga kasagaran sa mga isda nga pinabuthan gikan sa Probinsiya sa Masbate.

Ang pantalan adunay station sa Philippine Coast Guard, Philippine Navy ug Maritime Police apan si Go naglibog kung nganong daghan ang makalusot.

Dugang ni Go nga gi-estorya na niya ang mga opisyal sa maong mga unit kabahin sa problema.  (BANAT NEWS)