Assistant ni Rama gitun-an nga pakasohan

CEBU, Philippines - Tun-an karon ni Konsehal Sisinio “Bebs” Andales kun adunay kasong mapasaka batok ni Ancieto Abbey Canturias nga giingong kawani sa Cebu City Hall apan maoy Visayas media bureau chief sa United Nationalist Alliance (UNA).

Nahimo kining isyu human sa pasangil nga gigamit ang kalihokan sa Cebu City Medical Center sa pamolitika dihang nangabot didto ang mga supporters sa UNA ug sa Team Rama ni Mayor Michael Rama.

Giangkon ni Canturias nga giimbitahan niya ang sakop sa Team Rama ug ang ilang mga supporters sa maong kalihokan. Apan iyang gipanghimakak nga gigamit sa UNA o bisan sa Team Rama ang maong kalihokan para sa ilang pagpangampanya. Si Canturias usab maoy nangulo sa Cebu City Investment Promotions Center ubos sa kagamhanan sa siyudad.

Nakakuha og kopya ang Banat News sa imbitasyon nga gipanghatag ngadto sa mga opisyal sa barangay nga nag-awhag kanila pagdala og supporters.

Matud pa nga ang suwat adunay logo sa UNA ug gipirmahan kini ni UNA Regional Coordinator Mayor Michael Rama.

“We are pleased to invite you and at least 100 of your close supporters to be with our North and South District candidates attending the 1st Cebu City Open Hip-Hop Showdown at 5 p.m. – 8 p.m. February 11, 2016 at the Robinsons Galleria,” nga unod sa maong imbitasyon.

Apan si Rama nagkanayon sa iyang bahin nga wala siya’y nakita nga problema sa maong suwat ug dili siya angayan nga mangayo og pasaylo sa mga naapektuhan. Ang Civil Service Commission (CSC) mipasabot nga supak sa Civil Service Code nga mangampanya ang usa ka empleyado sa gobiyerno alang sa usa ka kandidato. Si Canturias gikatahong sweldado sa Cebu City Hall isip usa ka casual nga empleyado ug executive assistant ni Rama.

Usa sa gitan-aw karon ni Andales mao ang posibleng paglapas ni Canturias sa Omnibus Election Code, paglapas sa ethical standards of a public official, ug ang CSC.  (BANAT NEWS)