Eskuyla ‘sa og abogasya

CEBU, Philippines - Gihagit ni Mayor Michael Rama nga moeskwela una og abogasya si Konsehal Alvin Dizon una kini mokwestiyon sa iyang pagpadagan sa siyudad ilabi na sa pagpamasangil niini kaniya nga “anti-poor.”

Matud pa ni Rama nga adunay national laws nga kinahanglang sundon may kalabotan sa kahimtang sa mga kabus.

Ang gipasabot sa mayor mao ang Urban Development and Housing Act of 1992 (UDHA).

“ Wala ba diay due process, moingon gani ka og moratorium mura ka anang pareha sa akong kaatbang nga ang siyudad nga gi- moratorium dili pud na ma- effective, dili pud na mahimo,” matud pa ni Rama kabahin sa ordinansahon nga giduso ni Dizon nga nag-awhag sa pagpatuman og moratorium batok sa mga demolisyon sa mga informal settlers. Giklaro ni Rama nga dili anti-poor ang iyang administrasyon anti-poor tungod sagad sa gi-implementar o gipangbuhat nila para sa kaayohan sa kadaghanan ug dili lang sa pipila.

“Unsay anti poor? Tan-awa ang Lorega na nindot.Didto ko sa Laguna pagkanindot sa ilang re-blocking. Sa dan paingon Carreta paingon T. Padilla, tanan gi-reblock, gihatagan og luag nga dan, anti poor diay na?”dugang pasabot ni Rama.

Apan si Dizon nihagit hinuon ni Rama nga makig-debate kaniya kung tinuoray gyud nga nisunod si Rama sa balaod sa pagpahigayon og demolisyon.

“Akong hagiton ang mayor og usa ka debate kung tinuoray ba nga nisunod siya sa balaod sa pagpahigayon og demolition sa urban poor,”matud pa ni Dizon .

Giawhag usab ni Dizon ang mayor pagbalik og tuon sa ordinansahong iyang gisugyot.

Si Rama misupak sa maong ordinansa tungod kay matud niya nakalapas kini sa balaod. Bisan si Vice Mayor Edgardo Labella kinsa kanhi Deputy Ombudsman for the Visayas   kinsa milingkod nga acting mayor sa dakbayan wala mouyon sa maong ordinansahon kay supak sa balaod.

“Kanang anti poor nga estorya nila dili na tinuod, kay maong gi-veto ni Edgar (Labella)  tungod kay si Edgar abogado kana, ug ang nagpadala sa ordinansa abogado na?” pangutana pa ni Rama.

 “Napildi ang ilang ordinance ingnon dayon ko nga anti poor.Napildi ang ilang ordinance tungod kay nakalapas sa national law.Ayaw gamita ang anti poor (kay) dili na mao,”matud pa ni Rama.  (BANAT NEWS)