Pagdaginot sa tubig giawhag sa DENR

CEBU, Philippines - Giawhag karon sa Department of Environment and Natural Resources ang katawhan nga dili mag usik-usik og tubig angay na nga magpundo niini karong nagpadayon gihapon ang El Niño nga posibleng hinungdan sa pagnihit og tubig.

Matud pa ni DENR regional director Isabelo Montejo, kinahanglan usab susihon ang mga tubo kun wala bay buslot, mogamit og balde kun maligo, maghugas sa sakyanan o pagpamubo sa tanom inay nga mogamit og shower o hose aron di mausik.

Sumala pa ni Montejo, kasagaran maapektahan sa El Niño ang agrikultura, panagatan, ug ang kalikupan.

Ilaha usab karon gitutokan ang mga lugar nga aduna silay reforestation projects ubos sa National Greening Program.

Si Montejo, nipadayag nga mahimo ra magamit ang tubig nga gigamit sa pagkaligo, pag toothbrush, paglaba aron ibubo sa mga pansayan, panglimpyo sa sakyanan, sa mga salog ug bisbis sa mga tanom.

Ang El Niño usa ka abnormal nga pag-usab sa lakaw sa panahon tungod sa epekto sa pagsige og saka sa temperatura (kainiton) karon sa Pasipiko nga nakaapektar na sa tibuok kalibotan. (BANAT NEWS)