Palma: Pagpili og kandidato angay pamalandongan

CEBU, Philippines - Mga tarong ug kadto lamang adunay kapabilidad mangulo sa katawhan maoy angay nga botaran sumala pa ni Cebu Archbishop Jose Palma sa Archdiocese of Cebu.

Si Palma nanawagan niini atol sa pagsugod na sa panahon sa kwaresma. Matud pa niya, angay nga karong mga panahona ilakip sa pamalandongan sa mga tawo mao ang pagpili gyud sa hustong kandidato sa umaabot nga piniliay.

Matud pa sa Arsobispo, ang Catholic Bishop Conference of the Philippines, kanunay gayud mipahimangno nga ning nagsingabot nga eleksyon kinahanglan gayud ilhon kung kinsa ang mga nanagan nga politiko.

Kinahanglang tan-awon sa katawhan kun unsang klaseha sa kinabuhi aduna ang usa ka kandidato, kun unsa ang ilang mga nahimo sa nanglabay nga katuigan sa ilang panerbisyo, unsa nga mga programa ang ilang nahimo nga nakatabang og dako sa kinabuhi sa mga tawo.

Siya midugang nga kinahanglan usab iapil sa pagtan-aw kung si kinsa ang mga tawong nagpaluyo sa maong mga kandidato.

Nasayran nga adunay mga reports kabahin sa mga kandidatong gidudahang nakiglambigit sa mga kriminal ug adunay dili magpanuko paggamit og bayolenteng pamaagi aron sila maoy matuman ug aduna usab kanila ang gidudahang gisuportahan sa mga drug lords sa ilang pagkandidato.

Sumala pa ni Palma, angayan nga gamiton sa katawhan sa husto ang gahom sa ilang kagawasan sa pagbotar nga kadto lamang gyud mga tarong nga kandidato maoy angayan nga botaran ug ibutang sa pwesto aron dili mag-antos ang katawhan kun sila na unya maoy makalingkod.

Si Palma nipadayag nga niining pagtimaan sa panahon sa kwaresma, angayan pasupotan og pag-ampo ang pagpamalandong aron magiyahan ang katawhan pagpili kinsay angayan botaran. (BANAT NEWS)