Papa pusher nakasibat, anak babaye nasikop

CEBU, Philippines - Nadakpan ang upat ka tawo lakip ang anak nga babaye sa usa sa gituohang drug pusher atol sa pagpangronda sa mga sakop sa Criminal Investigation and Detection Group-7 ug Talisay City Police Station sa Barangay Biasong kagahapon sa buntag.

Matud ni Senior Supt. Marlon Tayaba, hepe sa CIDG-7, nga ang operasyon tipik ug kabahin sa ila’ng programa nga One Time-Big Time. Target sa operasyon si Bernard Belleza kinsa nakasibat apan nadakpan ang iyang anak nga si Shane ug laing tulo nga sila si Christian Gomez, Christian Lariat ug Ariel Bacarisa.

Si Tayaba niingon nga usa ka level 3 drug pusher si Belleza nga makabaligya og 200 gramos nga shabu matag semana. Narekober sa mga polis ang daghang pakete sa gituohang shabu nga kantidad og P400,000.

Gikonsiderar ni Tayaba nga “big time” si Belleza nga naghimo sa negosyo sa ilang pamilya.

Nagpalabwanay

Samtang napusasan ang duha ka drug pushers human sila na “wow mali” dihang ilang gibaligyaan og shabu ang mga nag-sibilyan nga polis sa Sitio Mahayahay, A Lopez, Calamba, Dakbayan sa Sugbo pasado alas 12 sa nakalabay nga kadlawon.

Ang mga dinakpan mao sila si Steve Ratila Alegarme ug Maribel Sambelan Bardoc nga nagpuyo sa maong dapit.

Daghang mga pinakete sa shabu ang nasakmit sa kapolisan nga mokabat kapin sa P30 mil ang kantidad.

Si Police Officer 1 Nelson Nodalo niingon nga ilang nakita ang duha ka suspek nga naglingkod daplin sa dalan ug nanghagad sa mga polis kung ganahan pa sila nga mopalit sa ilang baligya.

Nakurat ang mga polis sa dihang pinakete sa gituohang shabu ang ilang nakita gikan ni Bardoc nga mao’y unang nitunol sa mga polis.

Wala usab nagpaulahi ang kauban nga si Alegarme ug nipakita usab sa iyang dala nga drugas ug nanghinambog pa nga mas daghan siya og dala.

Didto na gihawiran sa mga polis ang duha ug gisikop. Nakuha sa mga polis gikan ni Alegarme ang 31 ka medium-sized sa gituohang shabu samtang 23 usab ka medium-sized ang nakuha gikan ni Bardoc.

Shabu ug marijuana

Sa Dakbayan sa Danao, nadakpan sa buy-bust operation si Gerry Pataluna Jr., 27-anyos, wala’y trabaho ug nagpuyo sa maong dapit.

Ang team nilang Police Officer 3 Fiel Restauro ang naghimo sa pagpatrolya ug ilang nalabyan sa ngitngit nga lugar ang duha ka tawo nga nagtunol og gamay nga pinutos nga gituohan nila’ng shabu.

Dali kini nilang gihunongan sa sakyanan ug ang suspek ug ang lalaki nga gitunolan unta og shabu nikaratil og dagan. Ang nahibilin nga ilang gisita nakuhaan og duha ka gamay nga pakete sa shabu hinungdan nga gidakop. Laing nadakpan nila ni Restauro ang usa ka babaye nga giila nga si Mildred Tapayan, 45, nagpuyo sa Beatrez Village, Poblacion.

Sa pagtunol og shabu bugti sa P200 nga marked money, dali kini nilang gidakop ug dugang napulo ka pakete ug P900 nga gituohang halin ang nakuha dihang girekisa.

Samtang sa Barangay San Vicente, Liloan nadakpan ang usa ka Jonathan Calderon, 35, nagpuyo sa maong lugar.

Si Police Officer 3 Renato Pendo sa Liloan Police Station niingon nga ang silingan nga si Crisanto Guc-ong Quiapo, 59 ang gisukmag.

Nangayo og panabang sa ilang buhatan ang biktima ug ang suspek dali nga nisibat apan gigukod sa mga silingan ug nasikop. Dihang girekisa ang kalawasan mao’y ilang nakuha ang duha ka linikit nga pinaugang dahon sa marijuana.

Naalarma

Naalarma na ang Cebu Provincial Anti-Drug Abuse Commission sa pagkalambigit sa ubang mga polis sa ginadili’ng drugas. Matudni Joey Herrera, executive director sa CPADAC, nga matag tigum nila tali sa kapolisan ug Philippine Drug Enforcement Agency, si Gobernador  Hilario  Davide III kanunay mopahimangno sa mga opisyal sa kapolisan nga i-monitor ang ilang mga sakop.

Sa lungsod sa Alcantara giingong ang balay sa usa ka polis nga nadestino sa Bohol ang gihimo nga drug den.

Si Herrera nanghinaut nga ang kadagkuan sa kapolisan mohatag og pagtagad o mopahigayon og imbestigasyon sa mga impormasyon nga ilang giduso batok sa usa ka polis kinsa gidudahang niapil sa ilegal nga kalihukan. (BANAT NEWS)