IEC nagbilin og nindot sa Sugbo

CEBU, Philippines - Mapasalamaton si Cebu Archbishop Jose Palma sa kalampusan sa 51st International Eucharistic Congress nga gipahigayon sa Sugbo.

Matud pa sa Arsobispo nga padayon karon sila nga namayad sa mga balayronon sa gigamit sa kalihukan sama sa mga bus, sound system ug uban pa.

Gibutyag ni Palma nga magpahigayon unya sila og tigum tali sa mga tawo nga nagpaluyo sa finances aron makapaguwa na sila sa kinatibuk-an nga nagamit ug nagasto human unya sa pagpamayad sa tanang bayronon.

Sumala pa ni Palma nga malipayon siya’ng mopaambit nga base sa inisyal nga kasayuran nga iya nakuha gikan sa finance committee ug iya usab nabatyagan sa diha’ng nagpadayon pa ang kalihukan nga wala sila magkuwang ug hayan may sobra pa nga kantidad nga makuha gikan sa kinatibuk-an.

Dugang ni Palma nga malipayon kaayo siya sa kalihukan sa IEC tungod kay daghan kaayo siyang nadawat nga pahalipay ug pasidungog gikan sa mga delegado ug nangindahay ang uban nga makabalik ang uban sa umaabot nga kasaulogan sa ika-500 ka tuig sa Kristiyanismo sa Sugbo.

Si Palma nipadayag nga nahuman na ang IEC apan daku kaayo og ipasalamat tungod kay ang Archdiocese of Cebu adunay IEC Pavilion, nindot nga seminaryo, Eucharistic Garden of Thanksgiving ug lakip ang maanindot nga panghitabo nga dili mapalit og kwarta. (BANAT NEWS)