Mga kandidato pa-ampoon

CEBU, Philippines - Subay niini’ng pag-obserbar sa panahon sa kwaresma, si Cebu Archbishop Jose Palma niawhag sa mga magpapili sa umaabot nga piniliay nga mag-ampo alang sa ila’ng mga tinguha.

Pahinumdum ni Palma sa mga kandidato nga kung sila gyud ang mapili sa eleksiyon karong Mayo 9, angay nga magbilin sila og maayo’ng buhat sa katawhan.

Giklaro sa Arsobispo nga ang simbahan wala’y gidapigan nga mga kandidato apan andam sila’ng moabi-abi sa mga kandidato nga gusto’ng mobisita.

Gihulagway usab ni Palma nga dili maayo ang politiko nga gipaluyohan sa sindikato sa ilegal nga drugas. Dugang ni Palma nga mao’y hagit sa demokrasya ang gahum sa tawo sa pagpili ug pamalandungan usab niini ang tawo nga gitinguha’ng botaran.

Ang Catholic Bishops Conference of the Philippines niluwat og pamahayag nga anti-vote buying gyud ang CBCP diin matud ni Palma nga sukad pa kaniadto nga supak na gyud ang simbahan sa pagpamalit og mga boto.

Nanghinaut usab kini nga dili madani ang katawhan sa kwarta nga ihatag ug ang pagbotar ipasubay sa konsensiya.

Hingpit na’ng gisugdan sa tibuok Simbahang Katoliko ang pagtimaan sa panahon sa kwaresma pinaagi sa “Miyerkukes sa Badlis” kagahapon diin gihimo ang pagbadlis sa agtang gamit ang mga sinunog nga lukay.

Matud ni Palma nga ang kwaresma mao’y higayon sa pagpamalandong sa daku’ng gugma sa Dios ug panahon diin tungod sa gugma kinahanglan buksan ang kasing-kasing.

Si Palma, malaumon nga niini’ng panahon sa kwaresma samtang magpuasa ug maghinulsol ang katawhan, mopahigayon usab sila og mga buhat sa kalooy ilabi na ngadto sa mga tawo nga nagkinahanglan.

Gitug-an sa Arsobispo nga ang Semana Santa dili lang kutob sa kamatayon ni Kristo kung dili lakip usab ug angayan pamalandungan ang "Sakripisyo, Kamatayon ug Kabanhawan” sa Labaw nga Makagagahum. (BANAT NEWS)