MCWD naproblema sa ilang tubo ilawom sa Mactan Bridge

CEBU, Philippines - Wala pay nakitang pamaagi ang Metro Cebu Water District (MCWD) kun unsay buhaton nila sa ilang metal pipe line nga anaa magsubay kilid sa Mandaue-Mactan Bridge nga maigo gyud sa pag-ayo sa maong taytayan ug nakapahasol sa mga trabahador.

Ang dako kaayong puthaw nga tubo (two feet diameter) maoy giagian sa tubig nga gisuplay sa MCWD paingon sa dakbayan sa Lapu-Lapu ug anaa kini magsubay sa ngilit sa tulay mao nga maigo gyud kini sa nagpadayon nga repair works.

Si Regional Director Ador Canlas sa Department of Public Works and Highways (DPWH) mipahibalo nga gihunong nila ang pag-ayo sa deck slab sa taytayan kay giawhag nila ang MCWD sa paghimo’g paagi nga dili makahasol sa trabaho ang ilang mga tubo. Kay gihunong man usa ang pag-ayo sa ilawom sa tulay, gipangitaan lang usa og laing matrabaho ang mga kawani sa DPWH.

Apan gitagalan ni Canlas ang MCWD kutob karong Biyernes sa paghatag kanila og action plan kabahin sa ilang himuon sa water pipes kay kon dili, ipang-revoke sa DPWH ang excavation permit sa MCWD.  Si Engr. Andrew Magno, ang Officer-In-Charge sa MCWD Engineering Department, miingon nga gipangbalibaran sa DPWH ang ilang mga plano sama unta sa pagdugang sa ilang steel frame nga mahimong strap o higot sa pipe ug iruska nila ngadto sa beam sa taytayan.

Matud ni Magno nga niadtong Oktubre pa sila gipahibawo sa DPWH kalabot sa pagahimoong major repair sa taytayan.

Nasuta nga 60 porsiyento sa tubig sa Lapu-Lapu ug Cordova, gikan sa MCWD, hinungdan nga nihangyo sila sa DPWH nga unta motabang usab sila paghatag og uban pa nga sulbad sa problema.

Matud sa MCWD nga dili usab maayo nga maapektahan ang pagsuplay og tubig sa mga balay-patigayon ug panimalay sa Lapu-Lapu ug Cordova.

Gipasabot sa DPWH nga gikinahanglan na gyud ang pag-ayo sa taytayan kay sukad kini nahimo niadtong 1975, wala pa kini nahimoan og pag-ayo ug kuyaw na kun may katalagman nga mahitabo.

Ang maong 800 metros nga tulay nabanggaan og Japanese vessel nga M/V Sanko Elegance human kini nakabugto sa iyang pisi samtang gidunggo sa pantalan sa General Milling Corporation kaniadtong 1994.  Samtang gikabalak-an nga maapektahan ang industriya sa turismo tungod sa grabeng problema sa trapiko sa dakbayan sa Mandaue ug Lapu-Lapu kay ang mga pasahero nga gikan ug paingon sa Mactan Airport apil man nga maapektahan. (BANAT NEWS)