May kalalis sa tigbakayan tigbak
CEBU, Philippines - Human nakakita og lalis sa tigbakayan, usa ka lalaki ang gipusil patay sa wala mailhi’ng mamumuno sa Phase 3C Upper Camella Homes, Lawaan 3, Dakbayan sa Talisay niadto’ng nilabay'ng adlaw.
Ang biktima nailhan nga si Noel Ponce, hingkod ang panuigon, minyo nga nagpuyo sa nahisgutang lugar.
Si PO3 Ferdinand Pablo sa Talisay City Police Station nga nahinabi sa Banat News nagkanayon nga gikan sa tigbakayan ang biktima gumikan usab sa kapistahan sa nahisgutang lugar.
Apan ang biktima ang giingong nakakita og lalis diha sa tigbakayan kalabot sa pusta ug gipusil sa iya’ng dughan, liog ug wala nga bahin sa lawas.
Gidala sa Talisay City Hospital ang biktima apan gideklarar nga dead on arrival ni Dr. Ross Villero.
Si Pablo ug kaubanan ang nakarekober og unom ka kabhang sa .9mm nga armas.
Sigun ni Pablo nga ila’ng narekober usab ang kwarta nga P6,000 sa kamot sa biktima. (BANAT NEWS)
- Latest
