2 bag-ong nag-pusher sikop dayon

CEBU, Philippines - Kapin sa P200 mil nga kantidad sa shabu ang nasakmit sa kapolisan sa Lungsod sa Liloan gikan sa usa ka gidudahang drug pusher atol sa pagpangronda sa Purok Tambis, Barangay Cotcot pasado alas 4 sa nakalabay nga hapon.

Nasikop mao si William Rosal alyas JR, 33-anyos, taga Barangay Jubay ug gihulagway nga “level 3” drug pusher.

Matud ni Senior Insp. Ramil Morpos, hepe sa kapolisan sa Liloan, nga kapin usa ka semana ang ila’ng pag-surveillance sa suspek hangtud nga nakakuha sila og search warrant nga gi-isyu ni Judge Teresita Galanida.

Nadakpan si Rosal sulod sa iya’ng balay ug nakuha ang mga dagku’ng putos sa gituohang shabu nga kantidad og P212, 400.

Sumala pa ni Morpos nga ila’ng nahibaw-an bag-o pa lang sa negosyo sa drugas si Rosal.

Duga’ng ebidensiya nga nasakmit mao ang nagkadaiya’ng kagamitan sa pagsuyop sa ilegal nga drugas.

Ang suspek nagtingkagol na sa detention cell sa kapolisan ug gikatakda nga pasakaan sa tukma’ng kaso.

Samtang nasikop ang usa ka babaye nga tigpayuhot og ilegal nga drugas sa Sitio Magay, Barangay Tanke, Dakbayan sa Talisay niadto’ng niagi’ng gabii.

Ang dinakpan nailhan nga si Febe Obrero, 28-anyos, adunay kapuyo sa nahisgutang lugar.

Matud ni PO3 Ferdinand Pablo sa Talisay City Police Station nga may nitawag sa ila’ng buhatan nga may tulo ka tawo nga yano lang namaligya og ilegal nga drugas sa karsada.

Sila si Pablo ug kaubanan ang dali nga niresponde ug pag-abot nila sa lugar, naglumba sa pagpanagan ang mga namaligya og ilegal nga drugas apan si Obrero  ang  nakuptan sa mga polis.

Nakuha gikan ni Obrero ang usa ka medium pack nga shabu ug lima ka gagmay nga pakete nga nitimbang og 4.1 gramos nga gibana-bana’ng kantidad og P48,379.

Matud ni Pablo nga bag-o lang sa negosyo ang babaye ug ang kapuyo usa ka mananagat apan giingong plantalya lang kini nila ug sila nabuhi sa pagpamaligya og ilegal.

Ang dinakpan gipasakaan na og kaso’ng may kalambigitan sa ilegal nga drugas. (BANAT NEWS)