Campaign materials nga wa sa lugar tangtangon
CEBU, Philippines - Ang mga campaign materials sa lokal nga gibutang diha sa common poster area mahimong langkaton o sapawan sa campaign materials sa mga national candidates matud sa opisyal sa Comelec sa probinsiya. Si Provincial Comelec Election Officer, Ferdinand Gujilde nagkanayon nga wala pa magsugod ang election period sa lokal candidates kay ang sa national pa ang nagsugod kagahapon.
Apan aron walay kagubot nga mahitabo, kinahanglang makig-coordinate sa Comelec ang mga gustong mosapaw niini aron aduna silay proteksiyon.
Giklaro ni Gujilde nga kadtong mga lokal nga kandidato nga giingong nangampanya karon matawag nga “freedom of expression” pa ang ilang gihimo ug di matawag nga premature campaigning.
Ang campaign period sa lokal candidates magsugod unya pa sa Marso 25 apan posibleng maimplementar kini sa Marso 26 tungod kay ang Marso 25 natunong sa Biyernes Santo.
Giklaro usab ni Gujilde nga ang gihimo karon sa mga lokal nga kandidato dili pa kini matawag og pre-mature campaign.
Ang hurisdiksiyon sa Comelec karon sa mga kandidato lang sa national nga gilangkuban sa presidente, bise presidente, senador ug partylists groups. Ang mga lokal nga kandidatong magpataka karon og pamilit og posters mahimong ireklamo gamit ang mga lokal nga ordinansa sama sa anti-littering ug anti-billboard ordinances o ba kaha sa Civil Code of the Philippines. Ang Department of Public Works and Highways (DPWH)-7 kagahapon nagsugod na usab sa ilang “Oplan Baklas” o ang pagpanangtang sa mga political materials nga gipataka lang og pamilit nga wala masubay sa balaod.
Matud ni Ador Canlas, Regional Director sa DPWH-7 nga sakop sa ilang operasyon ang tibuok Central Visayas diin adunay gitahasang grupo sa matag distrito aron manangtang niini nga nakalapas sa gitugot sa Commission on Elections (Comelec).
Ang campaign poster areas mao ang mga merkado publiko, public plazas, ug barangay halls.Ang Comelec aduna say mga sakop nga gitahasang manangtang sa mga campaign posters nga gipataka og pamilit nga wala sa hustong lugar. Ang mga tarpaulin gilimitahan og 2x3 feet, samtang sa mga leaflets kinahanglang kutob sa long size nga bond paper. (BANAT NEWS)
- Latest
