Usa ka latang ulod
CEBU, Philippines - Usa ka lalaki ang nireklamo human nga ang sud sa de lata nga meatloaf nga iyang napalit gikan sa usa ka mall pulos buhi nga ulod ang sud. Ang maong lalaki nga si Eddie Dinapo nga nagpuyo sa Lumbani Subdivision, Sitio Guadalajara, Brgy. Guadalupe ning Dakbayan sa Sugbo midangop sa Banat News human kini nakaabli og meat loaf nga pwerteng daghana sa ulod.
Matud pa niini, napalit sa iyang anak sa usa ka mall ang maong de lata duha ka semana na ang nakalabay ug niadtong Lunes sa gabii ila kining giablihan.
Sumala pa ni Dinapo, ang maong pagkaon adunay tatak nga kini gi-manufacture Enero 2016 ug mo-expire Enero 2019 ug wala gayud lumping ang maong lata.
Si Dinapo naglibog kung asa siya makareklamo kay basin aduna pay laing mga de lata nga kadungan niini ang giulod. Si Dr. Eugenia Mercedes Canal, Medical Officer IV, nagkanayon nga ang kagaw nga sagad makita sa mga de latang pagkaon gitawag og Clostridium Botulinum. Sumala pa niya ang maong kagaw makakalibanga sa mga makakaon nga posibleng maka dehydrate sa mga tawo.
Dugang pa ni Canal, angay magmatngon ang mga mamalitay segurohon nga walay mga buslot ug lumping ang mga delata nga paliton.
Suway nga gikuhaan og pamahayag sa Banat News ang Bureau of Food and Drugs sa Department of Health, apan ang problema gipasa ngadto sa National Meat Inspection Service(NMIS).
Apan ang NMIS miingon nga ang Cebu City Department of Veterinary Medicine and Fisheries (DVMF) ang may hurisdiksyon niini.
Si Dr. Jennifer Laurente, sa DVMF nibutyag nga magpaabot sila og reklamo sa hingtungdan aron ila kining mahatagan og aksyon. (BANAT NEWS)
- Latest
