Di mosukli og P.50 ipareklamo
CEBU, Philippines - Giawhag ni Land Transportation Franchising and Regulatory Board (LTFRB) 7 Director Rey Elnar sa pagkuha sa body number o plate number sa mga jeep pasaheroan kun ang drayber magdumili sa pagtuman sa P6.50 nga minimum nga plitehan.
Ang maong awhag ni Elnar natigayon tungod sa mga nahipos niining kasayuran nga daghan pa sa mga drayber sa PUJs ang nagdumili sa pagsukli og 50 sentabos sa giplite sa ilang pasahero.
Matud pa ni Elnar nga gihimo na nila ang tanan alang sa paghatag og kasayuran sa mga drayber alang sa P6.50 nga bag-ong minimum nga plitehan ug dili na angay magpakaaron-ingnon ang mga drayber nga wala sila makadawat og kasayuran.
Si Elnar miingon nga gawas sa mga balita sa radyo, telebisyon ug nagkadaiyang pamantalaan gihatdan og mga sulat ang mga drayber diha sa kadalanan nga nagpahibalo sa bag-ong plitehan.
“P5,000 ang multa niadtong mga drayber nga mag-overcharging, mao nga kinahanglan nga ireklamo kanang mga drayber nga dili motuman sa tukma nga plitehan,” bahad pang Elnar.
Si Elnar miingon nga ang mga estudyante, mga senior citizen ug mga adunay kabilinggan sa panglawas kinahanglan nga mangayo og diskuwento nga 20 porsiyento.
Matud pa niya nga obligasyon sa mga drayber ang pag-andam daan og sinsilyo pangsukli sa pasahero apan iyang giawhag ang mga pasahero sa pag-andam daan og kaugalingon nilang sinsilyo.
Ang pagkunhod sa plitehan epekto sa pagkunhod sa presyo sa produktong petrolyo. (BANAT NEWS)
- Latest
