Gibinaklid, gisud sa basket

CEBU, Philippines - Usa ka patay’ng lawas sa lalaki nga gituohan sa kapolisan nga biktima sa  summary execution ang napalgan nga gisulod og dako nga basket nga gidagsa sa baybayon sa Aggis, Brgy. Poblacion, sa Lungsod sa Compostela kagahapon sa buntag.

Si NUP Amebel Mollena sa Compostela Police Station miingon nga ang mga lumolupyo sa maong dapit maoy unang nakakita sa maong patay’ng lawas ug gipahibalo sa ilang buhatan.

Dali nga naghimo og pakisusi ang kapolisan nga gipangulohan ni Senior Police Officer 2 Jaime Marolenia ug ilang nasuta  ang maong patay’ng lawas sa usa ka lalaki nga nagsul-ob og itom nga t-shirts nga adunay mga patik sa iyang kalawasan.

Ang kapolisan mibanabana niini nga anaa sa 18 ngadto sa 20 anyos ug nakita nga aduna kini mga samad sa ulo nga gituohang samad agi sa pagbunal og gahing butang.

Sumala pa nga ang maong patay’ng lawas gisulod sa dako nga basket ug gibinaklid sa paggapos sa pisi ug gibaatan pa ang baba og masking tape sa tuyo nga dili kini makasinggit.

Nagtuo ang kapolisan nga gipatay ang maong lalaki sa laing lugar ug pagkahuman gitambog sa dagat hangtud nga gidagsa kini sa nahisgotang dapit.

Ang maong patay’ng lawas kasamtangan karong gipahiluna sa Maturan Funeral Home nga nahimutang sa maong lungsod. (BANAT NEWS)