Pag-resign ni John Yre gipaabot

CEBU, Philippines - Gipaabot sa konseho sa Dakbayan sa Talisay ang pagluwat sa katungdanan ni City Administrator John Yre de los Reyes karong adlawa.

Kini human sa pasiatab kaniadto sa mga tigbalita nga siya boluntaryo’ng moluwat sa katungdanan sa rason nga motutok siya sa pagka-campaign manager sa grupo sa iya’ng amahan nga si Mayor Johnny de los Reyes (JVR).

Si JVR ang magpasubli sa pagka-mayor ug subli usab nga ikaatbang si kanhi kongresista Eduardo Gullas kinsa iya’ng napukan niadto’ng 2013 nga eleksiyon ug si Bise Mayor Romeo Villarante.

Si Konsehal Danny Caballero nitug-an sa Banat News nga dinhi masukod ang palabra de honor ni John Yre tungod kay buwan naman sa Pebrero.

Siya nagkanayon nga wala na’y laing panahon nga moduso og resignation si John Yre kun dili karon na tungod kay magsugod na ang kampanya sa nasudnong mga kandidato.

"Wala man namo siya gihagit nga mukanaug sa iya’ng pwesto apan amo lang siya nga gipahinumduman sa iya’ng saad kay basin og nalimot siya," matud ni Caballero.

Si Konsehal Aldin Diaz nisaysay nga iya’ng paabuton ang pagkanaug ni John Yre.

Matud pa niya nga niabot na ang buwan nga iya’ng gisaad apan hangtud karon wala pa gihapon mobiya.

"Kani ra ba'ng mga klase sa mga tawo baba-on kaayo tagsa lang ra ba ni motuman sa iya’ng estorya. We will wait and see when we cross the bridge," dugang ni Diaz.

Sa nasayran, si John Yre ang nipahibawo nga mo-resign karong buwana aron motutok sa pagka-campaign manager sa grupo sa iya’ng amahan.

Ang campaign period sa lokal magsugod karong Marso 25 apan ang mga kandidato ang hagbay ra nga nagsige og suroy-suroy sa nagkalain-laing lugar sa Talisay.

Si John Yre gideklarar nga persona non grata sa konseho niadto’ng niaging semana human sa iya’ng pagpakauwaw kanila sa Facebook ug ingon man diha sa binayran nga programa sa radyo.

Gipa-imbestigar usab siya sa konseho human nanggawas ang report nga gibiyaan niya ang iya’ng asawa ug nikuyog sa laing babaye.   (BANAT NEWS)