Nagbanhig ni Kap. Belong nailhan na
CEBU, Philippines - Naila na sa kapolisan sa Dakbayan sa Lapu-Lapu ang usa sa mga suspek ug gunman sa pagbanhig kang Basak Barangay Kapitan Isabelito “Belong” Darnayla niadto’ng Sabado sa gabii diha sa General Aviation Road nga niresulta sa pagkalandig sa tambalanan human naigo sa iya’ng bukton.
Gikatakda karong adlawa nga ipasaka ang kaso’ng frustrated murder batok sa duha ka suspek, matud ni Senior Supt. Arnel Libed, director sa Lapu-Lapu City Police Office.
Usa ka case conference ang gihimo sa LLCPO uban sa Criminal Investigation and Detection Group (CIDG)-7 diin giila sa kapitan ang gunman.
Dili pa hinuon ikabutyag sa kapolisan ang pagkatawo sa gunman sanglit nagpadayon pa ang ila’ng gihimo’ng follow-up operation apan gipaabot nga mopagawas og facial composite ang kapolisan aron ipakatap aron masikop sa dali’ng panahon ang mga responsable sa krimen.
Sigun pa ni Libed nga ang motibo nga ila’ng gisubay karon mao ang hugot nga kampanya batok sa ilegal nga drugas ug pagdisiplina sa mga grupo nga nakita sa kapitan nga naghimo og dautan.
Gihulagway nga planado ang pagpamanhig sa kapitan apan wala lang magrabihi sa pag-igo si Darnayla ug ila na usab nga gipaubos sa profiling ang mga suspek aron pagsuta kun sila sakop sa gun-for-hire.
Nasayran nga diha’ng nahitabo ang insidente, ang kapolisan dunay giimbitar alang na sa mga pagpangutana apan ila ra usab kini’ng gibuhian kay wala man sila’y gihuptan nga igo’ng ebidensiya.
Ang mga suspek lakip na kadto’ng tag-iya sa traysikol nga giabandonar sa crime scene nga matud ni Libed ania pa sa Sugbo ug ang mga operatiba sa LLCPO subsob ang pagpangita sa mga suspek aron masikop dayon ilabi na nga gimando ni Mayor Paz Radaza nga paspasan ang pagsulbad sa kaso. (BANAT NEWS)
- Latest
