3 magsuong treasure hunters namatay
CEBU, Philippines - Tulo ka managsuong treasure hunters ang nangamatay human sila na-trap sa 20 ka tiil nga lungag nga ilang gisud duol sa ilang panimalay sa Sitio Bugtong, Brgy. Tan-awan sa Kabankalan City niadtong Sabado sa hapon.
Ang mga nangamatay giila nga sila si Danilo Nabas, 42, ug mga manghod nga sila si Rolando, 40, ug Reynante, 33. Matud pa sa report, ang bayaw sa managsuon nga si Joseph Masola misangpit kanila diha sa ilawom nianang pagkaudto apan gikatahong wala gyud sila manubag. Tungod niini, nikanaog sa lungag si Masola aron pagsusi sa mga bayaw, apan tungatunga pa lang iyang naabot paubos, nakatimaho siya og isog kaayo nga baho nga susama og asupre (sulfur) ug naglisod siya sa pagginhawa.
Dali siyang misaka pagbalik ug nangayo og tabang. Daling miresponde ang mga rescuers ug nakuha ang managsuon gikan sa ilawom apan wala nay mga panimuot ug daling gidala sa tambalanan apan pagabot didto gideklarar sa mga doktor nga patay na ang tulo.
Matud pa sa hepe sa Kabankalan City Police nga si Superintendent German Garbosa gisugdan pagbuho sa magsuon ang lugar niadto pang nilabay nga tuig. Kini human matud pa nga ang usa sa namatay nga si Rolando gipadamgo nga adunay mga gilubong nga gold bars duol sa ilang balay mao nga ilaha kining gikawot. (BANAT NEWS)
- Latest