Padayon ang pakigbisog

CEBU, Philippines - Sa atong nasayran, bisan og diha’y quorum sa session sa House of Representatives (213 ang nanambong) kaniadtong Pebrero 3, apan gikalit pag-adjourn ang session ni House Speaker Feliciano Belmonte.

Tungod niini, wala mahinayon ang laraw pag-override sa pag-veto o pagsalikway ni Presidente Noynoy Aquino sa gipangayo nga P2,000 nga usbaw sa pension sa Social Security System (SSS).

Dako ang kahiubos sa mga senior citizens nga nakasaksi sa maniubra nga gihimo aron dili matagad ang resolusyon pag-override unta sa Presidential veto.

Apan bisan pa niini, si Rep. Neri Colmenares sa Bayan Muna Party-list, ang main author sa maong resolusyon, miingon nga ilang ipadayon ang pakigbisog, bisan pa og muabot sila sa Korte Suprema.

Sa ato na nga nahisgotan dinhi, si Colmenares, ug ang mga co-authors sa resolusyon, mipasabot nga bisan og P5,000 pa ang usbaw, dili ug dili gayud ma-bangkarota ang SSS, kay lagi, tulobagon kini sa gobiyerno nga dili makabsan og kuwarta ang SSS.

Mabangkarota lang ang SSS kun ang gobiyerno mismo maoy mabangkarota. Ang nasud adunay budget nga kapin sa P3 trilyones.

Nganong mabangkarota man ang gobiyerno ug ang SSS? Nakapangutana si Colmenares kun nganong dili man mosugot si Presidente Noynoy nga kunhoran ang operational expenses sa SSS, ilabina sa makabungog nga perks and privileges sa iyang mga opisyal?

Atong padayunon ang pakigbisog. Pagkakaron, atong padayonon ang signature campaign pag-support sa resolusyon sa House pag-override sa pag-veto sa presidente sa atong pakiluoy nga ihatag nganhi kanato ang gikinahangan kaayo nga usbaw sa atong pension.

Porbida sab si Noynoy uy, di man maka-imagine unsay mahimo sa P1,500 nga pension sa mga retirees sa kalisud sa panahon karon.

Tan-aw nako, usa kini ka blessing in disguise kay gumikan niini, nagkahiusa kitang mga senior citizens. Atong ipalanog ang hiniusa ug makabungog nga tingog batok sa pag-veto sa presidente sa atong mga tinguha. Aduna kitay common cause. Subidahon kaayo, apan ato kining mabuntog kun magkahiusa lang kita.

Wala’y labot ang politika niini kay kaayohan man sa kinabag-an, regardless sa individual nga mga political leanings sa mga sakop sa kahugpungan.

Aduna kita’y kapin sa 100 ka barangay chapters sa mga senior citizens associations. Kun makakuha kita og signatures, bisan katunga lang sa kinatibuk-an nato nga gidaghanon, daghan na kaayo, makabungog na kini ni Noynoy.

Nganong dili man kini mahimo nato? Kun ang pagpapirma atong  iatol sa mga chapter meetings, mas daghang pirma ang atong makuha.

Atong padayunon ang pakigbisog, hangtod nga atong makab-ot ang gitinguha nga usbaw sa atong pension. 

Tuod man, wala’y labot ang politika, apan lagmit ma-affected ang kandidatora ni Mar Roxas niini. (FREEMAN)