Ig-agaw sa notado’ng kriminal nakapusil
CEBU, Philippines - Patay diha-diha ang usa ka lalaki human gipusil sa ig-agaw sa notado’ng kriminal atol sa kapistahan sa Salvador, Barangay Tanke, Siyudad sa Talisay niadto’ng Sabado sa hapon.
Ang biktima nailhan nga si Jesus Reyes Nino, 30-anyos, ulitawo nga nagpuyo sa nahisgutang lugar samtang ang suspek mao si Richard Daan Cabando, 38, ulitawo.
Matud ni SPO2 Yvonne Ilustrisimo sa Talisay City Police Station nga nag-inom ang biktima ug ang suspek isip pagselebrar sa kapistahan sa ila’ng lugar.
Apan kalit lang nga nitumaw ang panaglalis sa duha ug nadunggan ang buto sa armas.
Nahagba ang biktima samtang nisibat ang suspek. Gidala sa tambalanan ang biktima apan gideklarar kini nga dead on arrival.
Samdan sa iya’ng buko-buko ang biktima.
Sigun pa ni Ilustrisimo nga ang suspek ig-agaw sa napatay sa kapolisan nga notado’ng kriminal nga si Richie Daan niadto’ng niagi’ng tuig human nisukol sa pinusilay. Hinuon gitug-an ni Ilustrisimo nga wala’y laing rekord sa ila’ng buhatan ang suspek. (Gabriel C. Bonjoc/GMR)
86 punoan sa marijuana naibot sa Danao
Mokabat sa 86 ka dagku’ng punoan sa marijuana nga gitanum sa usa ka luna sa bukirang bahin sa Barangay Pili, Dakbayan sa Danao ang naibot sa kapolisan atol sa pagronda pasado alas 3 sa niagi’ng kadlawon.
Matud ni Police Officer 3 Arnold Labine sa Danao City Police Station nga base sa presyo sa Dangerous Drugs Board (DDB), ang market value sa mao’ng marijuana anaa sa P86,000.
Ang pagpangronda natigayon human sa pipila ka mga adlaw nga pagsuhid hangtud nga nasuta ang pagpananum og marijuana.
Ang hepe nga si Chief Inspector Proctacio Lim ang nangulo sa pagpangronda.
Hapon na nahuman ang kapolisan sa pagpangibot sa marijuana ug gidala sa PNP Crime Laboratory sa Dakbayan sa Sugbo.
Matud ni Labine nga wala sila makasikop og mga tawo ug posible nga nakasibat sa ila’ng paghidangat sa mao’ng dapit. (BANAT NEWS)
- Latest