Gireklamo sa mga ginikanan, namaligya’g nubain nasikop
CEBU, Philippines - Arestado ang usa ka 20-anyos nga lalaki nga mibaligya ug nakuhaan og di mominos 130 ka ampoules sa gidudahan “Nubain” nga usa ka illegal drug atol sa gihimo nga operasyon sa City Intelligence Branch diha sa Brgy. Kamagayan sa Dakbayan sa Sugbo.
Ang dinakpan mao si Cleve Ruben Saavedra, taga Sitio Indian, Brgy. T. Padilla ning dakbayan.
Matud ni Inspector Gomersendo Mandawe, CIB deputy chief, nakadawat sila og reklamo sa mga ginikanan nga nagpuyo sa maong barangay tungod kay aduna’y uban sa mga estudyante nga dili na mosulod sa klase ug adto na magpundohan ni Saavedra aron mag-inject og nubain.
Human sa hapit usa ka semana nga pagpaniid kang Saavedra, ila dayong gilusad ang operasyon niadtong Biyernes sa gabii diin ila kining napalitan og usa ka ampoule nga nubain sa kantidad nga P200.
Sa paghiling sa kapulisan sa bag ni Saavedra, didto ilang nakuha ang lain pa nga 130 ka ampoules nga aduna pay sulod. Si Saavedra wa motug-an kinsa iyang supplier apan gikatahong ibilin ra kini sa iyaha. (BANAT NEWS)
- Latest