Armadong hubog gidakop

CEBU, Philippines - Gidakop sa kapolisan ang usa ka tawo nga hubog nga nagbitbit og pugakhang nga nagbarog sa Sitio Tabok, Barangay  Tilhaong, Lungsod sa Consolacion alas- 5 pasado ang takna  sa buntag niadtong miaging adlaw.

Si Police Officer 1 Ritchie Guilleran sa Consolacion Police Station miila sa suspetsado nga mao si Joey Quiapo Pitogo, 26, nagpuyo sa maong dapit.

Matud pa ni Guilleran nga misumbong ang mga silingan sa suspek tungod kay nahadlok sila niini.

Ang suspek naabtang nagbarogbarog sa maong lugar nga gituohang pwerteng huboga ug nagbitbit kini og pugakhang.

Ang ilang hepe nga si Senior Inspector Wilson Abot maoy nangulo sa pagtubag sa maong alarma ug ilang naabtan ang maong lalaki nga nagbitbit sa maong armas.

Dali nila kining gisita ug maayo na lang nga wala kini mopakita og pagsukol ug dali kining nadisarmahan ug  gisikop.

Kaso nga kalapasan sa Republic Act 10591 o ilegal nga paghupot og armas ug paglapas sa  Comelec gun ban ang ipasaka batok sa maong suspetsado.  (BANAT NEWS)