Pag-veto ni Labella sa ordinansa ipa-override sa konseho

CEBU, Philippines - Maninguha si Konsehal Alvin Dizon nga ma-override sa Cebu City Council ang pag-veto ni Acting Mayor Edgardo Labella sa ordinansa nga nagmando og usa ka tuig nga paghunong sa demolisyon sa kabalayan sa mga kabus nga anaa nagpuyo sa publikong luna.

Matud ni Dizon nga atol sa ilang sesyon karong Miyerkules, moduso siya og resolusyon nga mag-awhag sa iyang kaubanan nga i-override sa City Council ang pag-veto ni Labella. Apan magkinahanglan sila og 12 ka konsehal nga mosuporta sa maong lakang.

Karong Miyerkules, si Labella mobalik na usab paglingkod isip presiding officer sa City Council kay   mapupos na man ang 60 ka adlaw nga pagsuspenso ni Mayor Michael Rama ug mobalik na kini sa serbisyo.

Kay 10 ra man ka konsehal nga alyado sa Bando Osmeña Pundok-Kauswagan (BOPK), kuwang sila og duha aron katugotan nga ma-override ang veto power ni Labella.

Gitinguha karon ni Konsehal Dizon nga makumbinser niya sila si Konsehal Nendell Hanz Abella ug Dave Tumulak, mga alyado sa Team Rama, aron moabot sila og 12 ka konsehal ug ma-override nila ang pag-veto sa acting mayor.

Si Konsehal Abella miingon nga suportahan niya ang tinguha nga i-override ang pag-veto sa acting mayor apan si Tumulak wala pa makuhai sa iyang pamahayag.

Matud ni Abella nga mosuporta siya sa ordinansa nga gisugyot ni Dizon tungod kay wala siya’y nakita nga daotan o supak sa balaod sa mao nga paghatag og usa ka tuig nga moratorium.

Si Labella mipasabot nga gi-veto niya ang ordinansa nga gipasar sa konseho kay nahisupak kini sa lagda sa Republic Act 7279, kon Urban Development and Housing Act of 1992.

Gitataw ni Labella nga kinahanglan gyud nga papahawaon ang mga namuyo duol sa esteros, garbage dump, ug waterways kay delikado kini nga puy-an.

Apan si Abella miingon nga giklaro man sa gipasar nila nga ordinansa nga dili apil sa moratorium kadtong mga balay nga gitukod sa makuyaw nga dapit.

Si Abella maoy chairman sa Local Housing Board ubos sa Executive Department ug si Dizon usab ang chairman sa Committee on Housing.  (BANAT NEWS)