Truck ban sa Mandaue padayong gipatuman

CEBU, Philippines - Nagpadayon ang gipatuman nga truck ban sa dakbayan sa Mandaue mao nga ang mga hingtungdang motorista giawhag nga sutaon gyud usa nila kun unsa ang oras nga gitugotan na ang mga trak sa pag-agi.

Si Roger Paller, nga maoy Public Information Officer (PIO) sa Mandaue, miingon nga gisirad-an sugod sa miaging gabii ang dalan D. M. Cortes nga kanhi dalan Plaridel ug ang dalan Ouano Avenue tungod kay gipahimutang na man sa kontraktor sa Department of Public Works and Highways (DPWH) 7 ang ilang mga ekipo.

Matud ni Paller nga ang mga sakyanan nga gikan sa dakbayan sa Sugbo paingon sa Mactan Airport ug Cordova mahimong moagi sa tulay nga kilid sa merkado ug mosubay sa karsada kilid sa Land Transportation Office (LTO) sa dalan Juan M. Ceniza sa Sitio Superior, Barangay Looc.

Ang mga sakyanan nga moagi gihapon sa kilid sa merkado nga mopaingon sa amihanang kalungsoran, adto moagi sa dalan Sotero Cabahug paingon na sa Ibabao Estancia ug ngadto na sa Consolacion.

Samtang gipabilin ang pag-ban sa mga delivery truck atol sa peak hours gikan alas 4 sa hapon hangtod sa alas 8 sa gabii.

Si Glenn Antigua sa Traffic Enforcement Agency of Mandaue (TEAM) miingon nga ang kausaban sa rota naggumikan sa pag-ayo sa Mactan Mandaue Bridge nga usa ra ka “lane” ang paagian sa mga sakyanan.

Gipasalig hinuon ni Antigua nga aduna sila’y mga traffic enforcers nga ipakatap aron modumala aron dili mag-ilogay ang mga drayber paglusot sa mga eskena.  (BANAT NEWS)