14 ka Filipino nangamatay sa sunog didto sa Iraq

CEBU, Philippines - Niabot og 19 ka tawo ang namatay, apil ang 14 ka Filipino, diha nga miulbo ang dakong sunog sa usa ka hotel didto sa Erbil, ang Capital sa Kurdistan Region nga sakop sa Iraq. Si Elmer Cato, ang charge d’affaires sa Philippine Embassy didto sa Iraq, mitug-an nga ang mga nangamatay nga Filipino pulos mga kawani sa four-star Capitol Hotel nga nasunog kaniadtong Biyernes sa gabii.

Matud ni Cato nga ang mga kawani sa Philippine Embassy sa Iraq makigtambayayong dayon sa mga opisyal sa maong nasud aron mailhan ang mga nangamatay ug mapadala ang ilang lawas balik dinhi sa Pilipinas.

Gikataho nga adunay labing menos 1,000 ka Filipinos nga tua nagtrabaho sa Kurdistan diin sagad kanila mga kawani sa hotel ug dagkong kan-anan, apan ang uban sab mga engineer ug nurses. Gawas sa nangamatay, daghan usab ang gipangdala sa lainlaing ospital human sila ma-rescue gikan sa nagdilaab nga hotel.

Ang gobernador sa maong dapit mitug-an sa mga tigbalita nga base sa pasiunang imbestigasyon nasuta nga electrical problem ang hinungdan sa sunog. Ang mga hulagway og video nga gi-post sa social media samtang nagpadayon pa ang sunog nagpakita nga hilabihan ka itom sa aso nga migawas gikan sa mga bentana sa hotel.

Ang report nagkanayon nga apil sa mga nangamatay mao kadtong miambak gikan sa tag-as nga andana tungod sa kahadlok sa nagsilaab na nga kayo ug baga nga aso.

Ang mga dapit sa Kurdistan region sa amihanang bahin sa Iraq maoy sagad bisitahan sa mga turista.

Kaniadtong 2010, usa ka hotel sa siyudad sa Sulaimaniyah, laing dakbayan nga sakop gihapon sa Kurdistan Region, nasunog sab ug nakapatay og 30 ka tawo.  (BANAT NEWS)