Siyam ka tawo sikop sa buy-busts

CEBU, Philippines - Gikan Muntinlupa ang kapin sa usa ka milyon ka pesos nga kantidad sa shabu nga nasakmit sa kapolisan sa Pinamungajan sa buy-bust operation nga gihimo niini batok sa usa ka suspetsadong drug pusher sa Sitio Tubod, Brgy. Poblacion sa maong lungsod. Ang nadakpan mao sila si Christopher Sacristan, ug iyang batabata nga si Alexander Bacalso kinsa pulos taga Brgy. Mambaling sa Cebu City apan temporaryong nagpuyo sa maong lugar.

Sumala pa ni Inspector Gilfred Baroman, hepe sa Pinamungajan Police Station nga nahinabi sa Banat News nga ang suspek makahurot og di mominos 100 gramos nga shabu matag adlaw nga mobalor og kapin usa ka milyon.

Ilaha usab nahibaw-an nga magbalhin-balhin ang suspek og pwesto ug kun init na siya sa iyang lugar mobalhin na ‘sab kini sa laing lugar.

Matud pa sa hepe nga kaniadto sa Brgy. Saksak nagbaligya ang suspek apan nakabantay kini nga daw init na siya sa maong dapit  maong mibalhin sila sa Poblacion. Apan sa miaging buntag nasakpan ra gyud ang duha sa kapolisan. Ang nasakmit nga shabu motimbang og 105 gramos nga mobalor og P1.2 milyones base sa bana-bana sa Dangerous Drugs Board.

Lapu-Lapu city

Samtang lima ka tawo ang gidakop sa kapolisan sa Dakbayan sa Lapu-Lapu sulod sa duha ka adlaw nga buy-bust operations.

Kagahapon sa alas 6:30 sa buntag, nasikop sila si Harold Amistad, 42, taga Sitio Abuno, Brgy. Pajac ug si Ronel Booc, 30, taga Sitio Mahayahay, Brgy. Bankal sa grupo ni Senior Inspector Mark Gifter Sucalit, hepe sa Lapu-Lapu City Police Office-CIB.

Matud pang Sucalit, si Amistad maoy target sa ilang operasyon nga gihimo diha sa Sitio Mahayahay. Apil sa gidakop sila si Mauro Casio, 22, ug si Arnold Pulgo, 28.

Nakuha sa  operasyon ang 66 ka gagmay’ng putos sa gituhoang shabu, P800 nga gituohang halin sa illegal nga drugas ug mga drug paraphernalia.

Sa miaging Biyernes sa buntag, nasikop sa kapolisan sa Pusok Police Station 5 si Lutcher Bilagantol, 18, diha sa Sitio Sta. Maria, Brgy. Pusok sa maong siyudad.

Matud ni Senior Inspector Wayne Magbanua, hepe sa Pusok Police Station si Bilagantol nalakip sa Top Ten Drug Personalities sa ilang hurisdiksyon.

Nakuhaan kini og usa ka medium size ug tulo ka gagmay nga paketeng gituohang shabu.

Liloan

Sa laing operasyon sa Liloan, mokabat sa P100,000 nga shabu ang nasakmit sa kapolisan diha sa Sitio Tiwasan, Brgy. Catarman nga miresulta sa pagkasikop ni  Leonel Cabang Bordo, alyas  Poloy, 31, taga Sitio Fatima, Brgy. Jubay.

Si Police Officer 3 Jayson Gayo sa Liloan Police Station  mibutyag nga ang ilang hepe nga si Senior Inspector Ramil Morpos maoy nangulo sa buy-bust operation ug ilang nasakmit ang duha ka dagko ug duha ka gagmay nga paketeng shabu uban sa P200 nga marked money, P550 nga salapi nga gituohang halin ug mga drug paraphernalia.

Mandaue City

Samtang ang kapolisan sa Presinto 1 sa Mandaue City Police Office (MCPO) nga gipangulohan sa ilang hepe nga si Senior Inspector Jimmy Portes ang nakasikop sa gipasanginlang drug pusher sa Sitio Santo Niño sa Brgy. Guizo nga si Cesar Codeniera,34. Nakuha kaniya ang tulo ka gagmay nga paketeng shabu ug sa parekisa sa iyang lawas nakuhaan kini og dugang usa ka medium size paketeng shabu uban sa P200 nga marked money.

Ang maong mga dinakpan gibalhog na sa prisohan ug pasakaan og kasong paglapas sa Republic Act 9165 o Comprehensive Dangerous Drug Act of 2002 ugmang adlawa. (Bryner Diaz, Christell Fatima Tudtud, Romeo T. Limpangog ug Dechie Ordiz)