Bana may nervous breakdown, asawa gidunggab

CEBU, Philippines - Nalandig sa tambalanan ang 27-anyos nga asawa human dunggaba sa iya’ng bana nga dunay nervous breakdown sa Sitio Laya, Upper Kalunasan, Dakbayan sa Sugbo pasado alas 10 sa nakalabay nga gabii.

Ang biktima giila nga si Ivy Abella samtang ang bana nga si Oscar, 29, ang gitumbok nga suspek. Matud ni Senior Police Officer 2 Rommel Bancog, imbestigador sa homicide section sa Cebu City Police Office nga nahinabi sa Banat News,  nga pirme lang magselos ang bana sa iya’ng asawa hinungdan sa ila’ng panag-away.

Apan nasayran usab sa kapulisan nga dugay na diay nga may  gibati nga nervous breakdown si Oscar sulod na sa pipila ka tuig.

Niadto’ng nakalabay nga gabii atol sa ila’ng panag-away, gidunggab sa bana ang iya’ng asawa gamit ang kutsilyo igo sa tiyan.

Ang amahan sa suspek mao na ang nitabang sa biktima ug gidala sa Vicente Sotto Memorial Medical Center (VSMMC).

Hinuon gipasabot ni Bancog nga sa ila’ng nakuha nga impormasyon, wala’y plano ang pamilya nga pasakaan og kaso ang suspek kinsa ila’ng gidala sa psychiatric ward sa VSMMC.  (BANAT NEWS)