Partido Kusgano lumad taga Opon

CEBU, Philippines - Giangkon sa Team Kusgano Movement for Better Lapu-Lapu nga sila lumad Oponganon ang ila’ng kagikan ug kaliwatan itandi sa ila’ng kaatbang sa umaabot eleksiyon.

Ang grupo gipangulohan nila’ng kanhi Cordova mayor, Dr. Celedonio Sitoy, kandidato sa pagka-kongresista, ug Engr. Rolando Patalinjug, kandidato sa pagka-mayor sa Dakbayan sa Lapu-Lapu, ubos sa Partido Demokratiko Pilipino – Lakas ng Bayan (PDP-Laban).

Si Sitoy makig-atbang ni Kong. Aileen Radaza nga anak ni Mayor Paz Radaza kinsa taga Lungsod sa Daanbantayan.

“Labaw ko og kasinatian kontra ni Aileen, daghan nahibawo sa akong mga nahimo, amo gisaligan ang kaliwatan nga naa ra sa isla sa Mactan,” matud ni Sitoy.

Mga ginikanan ni Sitoy pulos gikan sa dakbayan sa pamilya nga Baguio, Amores, Potot, Muñez, Tero ug Jumao-as sa habig sa inahan samtang Menguito, Taneo, Tajanlangit ug Suan sa habig sa amahan.

Si Patalinjug sa iya’ng bahin anak ni Pedro Patalinjug nga igsuon ni anhing Maximo Veloso Patalinjug kinsa nag-alagad isip mayor sa dakbayan sulod sa 23 ka tuig. Ang iyang inahan nga si Dionesia igsuon ni anhing Heneral Romulo Querubin sa mao’ng dakbayan.

“Kung nidaug si Pelaez og 11 ka barangay sa 2013 elections, wa’y rason di mi kadaug og mas labaw pa,” matud ni Patalinjug.

Ang negosyante nga si Efrain Pelaez, Jr. nga taga Dakbayan sa Sugbo napilde na kaduha ni Mayor Radaza ug magpapili na usab sa ikatulong higayon.

Matud ni Rufo Amores III, bise-mayor ni Patalinjug, nga ang ila’ng grupo ang giila’ng labing lig-on nga kontra sa mga Radaza sanglit sila ang sigehan og ataki.

“Usa na sa amo’ng gauge ang pag-ataki ni Radaza sa amo, kami sa grupo sa Elect Patalinjug Sitoy Amores (EPSA) nga magmadaugon gyud,” matud ni Amores.

Si Amores apo usab ni anhing Rufo Amores Sr., ang bise-mayor ni Maximo, kinsa sila mao’y responsable sa pag-ugmad sa Mactan Export Processing Zone panahon ni kanhi Presidente Ferdinand Marcos. (BANAT NEWS)