Ceiling fan nga nag-overheat niugdaw sa tulo ka balay

CEBU, Philippines - Tulo ka panimay ang naugdaw human niulbo ang sunog sa Sitio Salvador, Barangay Tanke, sa Siyudad sa Talisay kagahapon sa hapon ug nakaangol og usa ka molupyo.

Mga alas 2:55 sa hapon nadawat sa kabomberuhan ang alarma ug nakontrolar nila paglabay sa 5 -minutos ug sila mideklarar nga fireout paghuman sa 30- minutos ang milabay.

Gipaubos nila ni SFO1 Marcelino Aguilar ang sunog sa 2nd alarm ug sila gitabangan sa kabomberohan sa Dakbayan sa Naga.

Ang mga nasunogan mao sila si Antonio Tangub, 60; Mateo Layese, 58; ug Bartolome Boc, 35. Matud pa ni Aguilar nga nagsugod ang sunog didto sa panimay ni Tangub kun diin ang anak niini nga si Judy ang nipaandar sa ilang ceiling fan nahimutang sa taas nga bahin sa ilang panimay.

Nikanaug si Judy aron pagkuha sa butang nga iyang nakalimtan apan sa iyang pagbalik nisilaob na ang ilang lawak.Dali silang nanghakot sa ilang mga butang sa gawas. Ang kayo nikatap sa tapad nga balay nga gipanag-iya ni Layese ug kang Boc.

Matud pa ni Aguilar nga posibleng electrical misuse ang hinungdan sa sunog base sa pamahayag ni Judy apan wa nila gisira ang uban nga posibilidad sa hinungdan niini.

Nasamdan ang ilang silingan nga si Clint Basillote, 23, human nga nitabang sa pagpawong sa kayo. Gidala kini sa Talisay City District Hospital.

Si Aguilar nagkanayon nga ang panimay sa Tangub ang partially burn ug hasta kang Boc apan ang totally burn mao kang Layese.

Si Konsehal Danny Caballero kinsa miresponde sa dapit  miawhag sa Department of Social Welfare and Development sa siyudad nga matagaan og ayuda ang mga biktima sa sunog.

Dugang pa ni Aguilar nga naglisod sila pagsulod sa maong lugar tungod sa kahagip-ot sa karsada ug aduna pay daghang nakaparada nga motor ug trisikad sa agi-anan.