Gipusil sa tiyan, atay nabungkag

CEBU, Philippines - Nakabsan sa iya’ng kinabuhi sulod sa tambalanan ang usa ka dispatser human gipusil sa Bulacao, Dakbayan sa Sugbo pasado alas 9 sa nakalabay nga buntag.

Samad pinusilan sa tiyan nga nisangpot sa pagkabungkag sa iya’ng atay ang gikamatay ni Emmanuel Robillos, 36, nagpuyo ra sab sa mao’ng dapit.

Matud ni Senior Police Officer 2 Ruth Violango, imbestigador sa homicide section sa Cebu City Police Office, nga samtang naghimo sa iya’ng trabaho ang biktima kalit lang naabot ang duha ka lalaki ug ang usa ang nibunot og armas dayon pusil.

Nakahimo pa sa pagdagan ang biktima sa pikas eskina ug gisuwayan og tabang sa mga tawo ug gidala sa Cebu City Medical Center.

Apan pipila ka minutos ang nilabay nakabsan gyud sa kinabuhi si Robillos.

Sumala pa ni Violango nga base sa ila’ng pag-imbestigar sa lugar daghan na usab diay nga nahimo’ng kontra ang biktima ilabi na sa mga drayber sa jeepney sa wala pa matino nga hinungdan.

Gituohang revolver ang gigamit sa gunman sa pagpatay sa biktima kay wala’y narekober nga basiyo sa bala sa crime scene. (BANAT NEWS)