6 sikop sa shabu, 1 nisukol napusilan
CEBU, Philippines - Nasikop sa buy-bust operation ang upat ka tawo sa may First Batch, Pulpogan, Consolacion.
Ang nasikop naila nga sila si Ranie Juaton Rodrigo, 40, taga Barangay Danglag, kinsa naila nga “level 3” drug pusher ug usa sa top 10 target sa drug list sa Consolacion Police.
Laing nasikop naila nga sila si Richie Yaun, 35, residente sa lugar; Raymart Blanco, 20, ug Melchor Carreon, 23.
Matud ni Police Officer 3 Arthur Ariate, desk officer sa Consolacion Police Station, nga ang hepe nga si Senior Inspector Wilson Abot ang nangulo sa operasyon.
Pag-abot sa kapolisan sa lugar ug nakapalit na ang nagpaila nga poseur buyer, kalit nga nibunot sa armas si Yaun apan naunhan ni Police Officer 1 Dennis Pepito igo sa tiil hinungdan nga nadis-armahan.
Nakuha gikan ni Yaun ang .38 caliber nga adunay lima ka bala, usa ka gamay nga compartment nga dunay 37 ka gagmay nga putos sa gituohang shabu ug 20 ka tin foil, samtang ang subject nga si Rodrigo nakuhaan sa buy-bust money nga P200 ug sa gituohang halin sa drugas nga mokabat sa P1,600.
Sila si Blanco ug Carreon nakuhaan og tagsa ka pakete sa shabu ug tag-duha ka tin foil.
Sa kinatibuk-an niabot sa 4.93 gramos sa shabu ang nakuha gikan sa upat ka dinakpan nga mobalor og dul-an sa P60 mil base sa Dangerous Drugs Board nga presyo.
Samtang si Salvacion Ancajas, 35, nga taga Lapyahan, Labogon, Dakbayan sa Mandaue, ang nadakpan usab nila ni PO1 Paulino Borja sa Presinto 3 sa Mandaue City Police Office ug nasakmit ang usa ka pakete’ng shabu ug mga drug paraphernalia.
Dugang nadakpan mao si Arnel Mollejon, 28, taga Capulay, Tayud, Lungsod sa Consolacion ug nasakmit gikan niini ang mokabat sa P76,000 nga shabu.
Si Mollejon mao’y suspek sa pagpanglungkab sa tindahan ni Rodrigo Gungob sa Poblacion, Liloan nga nailhan pinaagi sa close circuit television camera ug nasakiyo ang P55,000 nga salapi.
Si Mollejon nadakpan sa follow-up operation sa kapolisan sa Barangay Tabla, Liloan diin didto kini magtago-tago nga nagdala og shabu nga gibaligya sa mga kustomer niini. (BANAT NEWS)
- Latest
