Tomas wa magtagad sa Unit II Carbon market

CEBU, Philippines - Gibasol sa mga manindahay sa Unit II sa Carbon Market si kanhi mayor Tomas Osmeña nga usa sa nakalangan sa pagpaayo niini sukad nasunog niadto’ng 1998.

Matud ni Ermita Barangay Kapitan Felicisimo “Imok” Rupinta nga gigamit hinuon ni Osmeña ang P153 milyones nga gi-loan ni kanhi mayor Alvin Garcia sa laing proyekto.

Si Rupinta nipadayag sa iya’ng kahiubos kang Osmeña tungod sa wala pagpakabana niadto’ng siya pa ang mayor sulod sa siyam ka tuig.

Apan si Osmeña nitataw nga wala siya’y gi-realign nga pundo sanglit supak kini sa balaud.

Nunot niini si Rupinta ug mga sakop sa Cebu City United Vendors Association (CCUVA) nanawagan nga dili sila apilon sa away sa politika tali ni Osmeña ug Mayor Michael Rama.

Nabalaka ang mga manindahay nga mosamot kalangan ang proyekto gumikan sa kaso nga gipasaka ni Osmeña sa buhatan sa Ombudsman.

“Ngano apilon pa man mi sa away pamolitika, pangampanya lang mo, dili lang hilabtan ang amo’ng merkado,”matud ni Barangay Konsehal Maria Pino Buanghug, presidente sa CCUVA. (BANAT NEWS)