PDRRMO nangandam kun mobuto ang Kanlaon

CEBU, Philippines - Ang Provincial Disaster Risk Reduction Management Office (PDRRMO) nagpahigayon og tracking sa pag-share sa mga advisories gikan sa Philippine Institute of Volcanology and Seismology (PHIVOLCS) may labot sa pagpangandam sa posibleng pagbuto sa Mount Kanlaon.

Si Baltazar Tribunalo, hepe sa PDRRMO nagkanayon nga sa ulahing advisory kagahapon sa alas 8:00 sa buntag , gidili na ang pagpaduol upat ka kilometro gikan sa baba sa maong bulkan kay giisip na kini nga permanent danger zone.

Matud ni Tribunalo nga sa ilang monitoring ang hangin pabor kini ngadto sa habagatang kasadpan ug ang mga lugar nga nahimutang niini maoy grabeng maapektahan kun mobuto gyud ang bulkan.

Si Tribunalo miawhag sa publiko nga mag-monitor usab aron makahibawo sa mga pasidaan. Ang lalawigan matag karon ug unya mopadala og updates sa advisories sa tanang local government units (LGUs).

Matud niya, kun mobuto gyud ang bulkan adunay posibilidad nga makasinati kita og linog o mouyog ang yuta ug wala usab isalikway ang posibilidad adunay motumaw nga tsunami gikan sa dagat.

Ang mga lungsod sa Asturias, Balamban, Pinamungajan, Aloguinsan, Barili ug dakbayan sa Toledo nga nag-atubang sa isla sa Negros diin nahimutang ang bulkan giingong unang maapektohan.

Samtang gipalig-on usab sa PDRRMO ang purok system nga diin gitudloan ang purok level sa angay buhaton kun dunay katalagman nga moigo sa ilang lugar lakip ang posibleng mga pamaagi aron alternatibo nilang kapanginabuhian. (BANAT NEWS)