Mini nga kwarta nikatap sa Talisay

CEBU, Philippines – Mini nga kwarta nisiaw sa dakbayan sa Talisay, hinungdan nga nanawagan si Superintendent Germano Mallari, hepe sa kapulisan sa siyudad nga dili mokompiyansa.

Matud pa ni Mallari nga panahon sa “Ber months” daghang transaksyon sa kwarta nga buhaton apan niini usab panahona adunay mga ipalusot nga mga pekeng kwarta.

Niadtong milabay’ng semana, usa ka ginang ang nidangop sa kapulisan human siya nabiktima ining bag-ong modus operandi nga ilis-ilis og kwarta diha sud sa usa ka mall sa maong siyudad.

Si Dominica Rosello, usa ka SSS pensioner nitug-an sa mga tigbalita nga niadtong Nobiyembre 15 mi-withdraw sa iyang pension diha sa ATM machine diha sa usa ka mall sa Barangay Lawaan 2.

Sigun pa niya adunay lalaking nagkalo nga nag-una niya ang nihatag niya og higayun sa pag-withdraw og una. Apan human siya naka-withdraw og P2,200, mihangyo ang maong lalaki nga magpatibuok sa iyang kwarta.

"Eh courteous yung lalaki sa akin kaya pinagbigyan ko siya. Pero nalungkot ako nung nalaman ko na fake yung pera ko," matud pa ni Rosello nga lumad nga taga Manila.

Ang suspek ang adunay unom ka tag P500 nga gipatibuok kang Rosello ug sa paglipat-lipat diha na nailis sa suspek ang mini nga kwarta ug daling nilakaw.

Anha lang niya nahibaw-an nga peke kini dihang wa dawata sa cashier sa grocery kay mini ang iyang gibayad hinungdan nga niduol siya sa opisina sa bangko aron pagsusi sa CCTV apan di maklaro ang nawong sa lalaki kay nagkalo kini. – /EIM) (BANAT NEWS)