Puya gisud sa paper bag

CEBU, Philippines – Usa ka bag-ohay lang natawo nga masuso ang napalgang buhi ug gisulod sa usa ka puwa nga paper bag atubangan sa usa ka tindahan diha sa Sitio Sto. Niño, Barangay Basak dakbayan sa Lapu-Lapu kagahapon sa6 buntag.

Matud ni PO3 Jennifer Sarapuddin sa Women and Children Protection Desk sa Basak Police Station 4 nga nakit-an kini ni Rubelyn Cambor, residente sa maong dapit sa alas 6 sa buntag. Adunay nag-viral karon nga video nga kuha atol sa pagsalbar sa masuso nga gi-post sa Facebook page sa “Cebu Flash Report” nga nakakuha dayon og 28, 417 views ug 1,117 shares atol ning pagsuwat sa balita.

Base sa inisyal nga imbestigasyon ni Sarapuddin, padung mangompra sa merkado si Cambor dihang nakabantay kini sa maong paper bag diha sa atubangan sa usa ka tindahan ug daw adunay naglihok-lihok sa sud niini maong iyaha kining gisusi. Nasurpresa siya sa iyahang nakita kay usa kini ka batang lalaki nga giputos og panapton. Aduna pa usab kini pusod timailhan nga bag-ohay pa gyud kining gipakatawo.

Daling mitawag si Cambor sa iyahang silingan ug mikontak siya sa kapolisan. Way nakabantay kun kinsay nibilin sa maong masuso.

Ang bata, gi-turnover sa Lapu-Lapu City Hospital sa Barangay Gun-ob alang sa dugang pag-atiman.

Matud ni Jae Honey Badio, medical social worker sa maong hospital nga himsog ang bata apan adunay nakit-ang bun-og sa ibabaw nga bahin sa walang mata niini.

Matud ni Badio ilahang dad-on ang maong masuso Norfil Foundation, usa ka non-governmental organization alang sa mga bata ug mga kababaihan nga nahimutang sa  Sitio Sangi, Barangay Pajo.

Matud ni Cherry Mayol, social worker sa Norfil, ilahang dawaton ang batang lalaki kung pormal nga maendorso kanila sa maong hospital.

Kun bulahan ang maong masuso nga napunitan kini dayon sa tawong may malumong kasing-kasing, sukwahi ang gidangatan sa usa ka fetus nga babaye nga giputos og panapton nga gisulod sa plastic bag ug gilabay sa basurahan.

Nakuykoyan na lang sa dumping site sa Barangay Pulog, Lungsod sa Consolacion niadtong Lunes sa hapon ang maong fetus.

Si Police Officer 1 Marivic Pepito sa Women’s Desk sa Consolacion Police Station miingon nga gisugat sa manguykoyay og basura ang garbage truck gikan sa dakbayan sa Sugbo.

Apan samtang nag-ilog sila og kuykoy sa basura, nakuykoyan nila ang usa ka plastic bag nga maayo kaayo og pagkaputos.

Nakugang sila paglili sa sud kay patay diay kini nga puya nga aduna pay pusod.

Human gipamisahan sa pari ang puya gilubong kini sa Barangay Pulpogan. – /EIM) (BANAT NEWS)