Shabu, granada ug armas nasakmit

CEBU, Philippines – Usa ka giingong empleyado sa Department of Public Works and Highways (DPWH) 7 ang nadakpan diha sa dalan national Barangay Poblacion, Dakbayan sa Danao tungod sa paghupot og armas, granada ug ginadiling drugas.

Si Police Officer 3 Marlon Remullo sa Danao Police Station miila sa nadakpan nga mao si Alexander Capuyan Tano, 46, nagpuyo sa Barangay Cambanay sa maong dakbayan.

Matud pa ni Police Officer 3 Roselo Campo sa Danao Police Station nga nakadawat sila og tawag sa telepono labot sa usa ka lalaki nga nagtaptap og panapton sa iyang nawong ug nagluklok og armas diha sa maong dapit.

Tuod man daling giadto sa mga polis ang dapit ug ilang nasigpatan ang suspek nagbarog daplin sa karsada hinungdan nga ilang gisitar, ug didto sa pagrekisa nakuhaan kini og usa ka armas, usa ka granada ug napulo ka paketeng gidudahang shabu.

Sa laing bahin, nadakpan sa buy-bust operation pinangulohan ni Senior Inspector Verniño Noserale, hepe sa Lapu-Lapu City Police Office - City Intelligence Branch si Sherwin Sagarino, residente sa Sitio Masiwa, Barangay Maribago sa alas 10 sa gabii.

Nagkanayon si Noserale nga unang nakigtagbo sa police poseur buyer sa maong dapit si Sagarino ug mitunol kini og lima ka gagmay’ng putos hinungdan nga kini gidakop.

Laing siyam ka gagmay’ng putos ug duha ka medium size nga pakete sa gituohang shabu ang nakuha sa posisyon ni Sagarino ug P400 nga gikatahong halin sa illegal nga drugas ug mga drug paraphernalia.

Gibana-bana nga mokabat sa P123 mil ang kantidad sa nasakmit nga drugas. – /EIM) (BANAT NEWS)