Nagdala’g shabu gikan Ozamis nadakpan
CEBU, Philippines – Nasikop sa mga sakop sa Siquijor Police Provincial Office ang tulo ka lalaki nga nagsakay og motorbanca gikan sa Ozamis City sa buy-bust operation sa lungsod sa Maria, Siquijor.
Ang nangasikop mao sila si Blaire Pacarat, 37; Jerry Paghasian, 49; ug Cesar Pacarat, 23, sa mga sakop sa Provincial Intelligence Branch ug sa mga operatiba sa Maria Police Station.
Sumala pa ni Superintendent Enrique Belciña, deputy provincial director sa Siquijor, ang tulo nagsakay og motorbanca gikan sa Ozamis ug midunggo sa Maria, Siquijor sa miaging adlaw.
Apan human nga nakahibalo ang kapolisan sa ilang modus gisugat dayon nila ang tulo og buy-bust ug dihang positibong namaligya sila og drugas gidakop dayon ang tulo.
Nakarekober ang kapolisan og duha ka medium packs ug 27 ka gamay nga pakete nga shabu nga mobalor og P90 mil.
Sumala pa ni Belciña gikompiskar sab ang motorbanca sa tulo. - /EIM) (BANAT NEWS)
- Latest
