Wa kadawat nga gibuwagan nanunggab

CEBU, Philippines – Nalandig sa tambalanan ang usa  ka babaye human kini ingon nga gidunggab makadaghan sa iyang kanhi live-in partner sa may dan A. Soriano, barangay Mabolo sa dakbayan sa Sugbo niadtong miaging kagabhion.

Si Jejerose Fajardo, 27, taga A. Lopez Street, sa barangay Labangon, nakaangkon og daghang samad dinunggaban human siya giingong gidunggab ni Nelson Aranes, 29, taga Upper La Guerta sa barangay Lahug.

Base sa imbestigasyon, si Fajardo mitug-an sa mga imbestigador nga niadtong Lunes sa gabii kalit miabot si Aranes nga may dalang gunting ug midunggab kaniya sa makadaghang higayon sa lain-laing parti sa iyang lawas.

Human niini, daling niikyas ang suspek ug wala na maabti sa mirespondeng mga sakop sa Mabolo Police Station.

Ang biktima gidala sa mga sakop sa Emergency Rescue Unit Foundation sa Vicente Sotto Memorial Medical Center.

Nakuha usab sa kapulisan didto sa crime scene ang gunting nga may gitas-on nga siyam ug tunga ka pulgada.

Ang duha nagpuyo sulod sa walo ka tuig ug  gituohan sa kapolisan nga wala pa makadawat ang suspek sa ilang panagbuwag. - /EIM) (BANAT NEWS)