Task group moila sa kalabera
CEBU, Philippines – Giumol kagahapon ang usa ka Special Investigation Task Group sa Cebu Police Provincial Office aron maila kung kinsa ang bukog nga napalgan sa mga residente sa Badian niadto’ng Domingo.
Matud ni CPPO Director, Senior Superintendent Noel Gillamac, nga ang SITG naglangkub sa Badian Police Station, Regional Crime Laboratory-7, Provincial Intelligence Branch ug sa Provincial Investigation and Detective Management Branch.
Tumong nila ang pag-ila sa kalabera kung kinsa ug unsa ang hinungdan sa kamatayon.
Usa sa gisubay karon sa kapolisan ang pagduda nga ang kalabera iya ni PO1 Jimmy Jorge nga nawagtang sukad pa niadto’ng Pebrero 24, 2014 ug na-blotter nga missing petsa 25 sa mao’ng buwan.
Sumala pa ni Gillamac nga narekober gikan sa dapit diin nakit-an ang kalabera ang usa ka kalibre .357 nga revolver nga may usa ka kabhang ug upat ka buhi’ng bala.
Nakapasamot sa pagduda sa kapolisan mao ang presensya sa mga IDs, lisensya, ATM card ug handheld radio nga isyu sa polis duol sa kalabera.
Apan sumala ni Inspector Henry Orbiso, hepe sa Badian, nga ang gisul-ob nga senina sa kalabera nga nakaplagan mao sab ang giingong gisul-ob sa polis diha’ng nilakaw usa ka tuig na ang nilabay.
Matud ni Orbiso nga nananghid ang polis nga molakaw apan pagka-ugma wala na nakabalik sa iya’ng balay mao’ng ni-file og police report ang asawa sa Pardo Police Station, Cebu City.
Si Gillamac niingon nga kinahangnlan nga ipa-ilawom ang kalabera sa DNA test ug mahiling og maayo.
Kung makompirmar na nga iya sa polis, sunod himuon ang pag-ila sa nipatay kaniya.
Si Jorge taga Manlapay, Dalaguete nga sikbit sa Santicon, Badian apan ang lugar diin nakaplagan si Jorge duol matud pa sa usa ka marijuana plantation. - /GMR) (BANAT NEWS)
- Latest
