Pagpangrehistro ipadayun sa Sabado

CEBU, Philippines – Ipadayun sa Commission on Elections ang pagpangrehistro karong Sabado.

Sugod kagahapon temporaryo’ng gihunong ang pagpangrehistro samtang nagpahigayun sa pagpanawat sa certificate of candidacy sa mga kandidato sa 2016 elections.

Si Provincial Election Supervisor, Atty. Lionel Marco Castillano, nagkanayon nga karong Sabado mobalik na sila sa pagpangrehistro.

Ang Comelec mopahigayun usab og pagpangrehistro sa mga malls sama sa gihimo niadto’ng Domingo sa Robinson’s Cybergate.

Karong Domingo, ang Comelec sa dakbayan sa Sugbo gikatakda gihapon kini sa pagpangrehistro sa mao’ng mall.

Si Comelec Chairman Andres Bautista niluwat og kamanduan nga gikan sa Oktubre 17 hangtud sa 31, 2015 magpahigayun na sila og off-site registration. Apan matud ni Castillano nga kadto’ng mga lugar nga diyutay na lang ang wala pa makaparehistro, sa Oktubre 26 ngadto sa 31, 2015 lang sila magpahigayun og off-site registration ilabi na kung anha ipahigayun sa covered court o gymnasium.

Ang duha ka buhatan sa Comelec sa dakbayan sa Sugbo gikatakda’ng magpahigayun og mall registration sa Robinson’s Cyber Gate karong Oktubre 11, 18 ug 25, 2015 nga mga adlaw’ng Domingo. Sa Oktubre 26 hangtud sa 29, ang Comelec sa dakbayan sa Sugbo gikatakda’ng mangrehistro sa Ayala Center Cebu ug sa Oktubre 30 ug 31 mobalik sa Robinson’s Cyber Gate.

Ang Comelec sa dakbayan sa Mandaue magpahigayun og pagpangrehistro sa Oktubre 26 hangtud 31 sa Pacific Mall.

Samtang butangan og dili momenus upat ka polis ang mga buhatan sa Comelec lukop rehiyon aron maseguro nga hapsay ang pagsang-at sa COCs.

Matud ni Senior Superintendent Rey Lyndon Lawas, hepe sa Regional Directorial Staff sa Police Regional Office 7, kini ang kamanduan ni PRO-7 Director Prudencio Tom Bañas.

Apan iya’ng giklaro nga dili magdungan ang upat ka polis ug magpuli-puli sila og duty sa buhatan sa Comelec.

Dugang ni Lawas nga ang kamanduan gihimo ni Bañas human nihangyo ang buhatan sa Comelec.

Apan sumala pa ni Lawas nga wala’y angay kabalak-an tungod kay ang mga kandidato dili kaayo makamugna og kagubot sa mga buhatan sa Comelec apan ang mga supporters nga mokuyog. - /GMR) (BANAT NEWS)