Natuk-an sa isda patay
CEBU, Philippines – Namatay ang 11-anyos nga batang lalaki human nga iyang gipaak ang isda nga iyang kuha aron mamatay apan mikisi-kisi kini ug nasud sa iyang alingagngag ug miungot kini didto sa sud.
Ang insidente nahitabo sa lungsod sa Maria sa lalawigan sa Siquijor diin usa ka Jeck Ian Carillo namatay pag-abot sa Maria Health Center. Si Police Officer 2 Jay Duhaylungsod, sa operations section sa Siquijor Police Provincial Office, nga nahinabi sa Banat News miingon nga namana sa dagat si Carillo ug ang iyang mga higala.
Matud pa nga namana sila sa lawod ug sa tanto nilang sawom-sawom sa dagat nakakuha gyud og Lizardfish o gitawag nga “balanghotin,” “karaho” ug “tuko-tuko.”
Sumala pa nga human maigo sa pana gikuha sa bata ang isda ug gikitkit ang ulo niini aron mamatay.
Apan gikatahong mikisi-kisi ang maong isda ug aksidenteng natulon sa bata ang maong isda ug didto niungot sa iyang tutonlan hinungdan nga naglisod kini og ginhawa.
“Namana ni siya naay kauban mga bata pagkakuha niya, iya utang paakon natulon noon niya,” matud pa ni Duhaylungsod.
Gitabang siya sa iyang mga kauban ug gidala ngadto sa health center apan gideklarar na siya nga dead on arrival.
“Nitabang ra gyud siya sa iyang ginikanan, namana intawon para panud-an,” dugang ni Duhaylungsod. - /EIM) (BANAT NEWS)
- Latest
