Gang-rape suspect nihangyo sa pamilya sa biktima

CEBU, Philippines – Mga suspek sa gang rape sa 21 anyos nga dalaga diha sa barangay Sambag 2 ning dakbayan sa Sugbo gituohang nia pa gihapon dinhi sa Sugbo ug wala pa nangalayas ug usa kanila ang misuway pa og hangyo sa iyaan sa biktima aron i-settle na lang ang kaso.

Kini maoy gibutyag ni Chief Inspector David Señor, ang outgoing acting chief sa Fuente Police Station. Matud pa niya, ang usa sa mga suspek nga gibanabanang nagpangidaron og 20 anyos gikaingong nipauli na sa ila sa Leyte.

Apan adunay nadawat nga impormasyon si Señor nga ania pa gihapon kini sa Sugbo kay giingong niduol kini sa iyaan sa biktima kay mihangyong di na paabton sa korte ang kaso ug i-settle na lang kini.

“Ang estorya niuli na daw siya sa Leyte but ni-text daw siya sa tagtungod sa biktima ug ganahan makigkita aron ma-settle ang kaso,” matud pang Señor, apan gikatahong desidido ang pamilya sa biktima nga ipadayon ang kaso batok sa mga       suspek.

Matud pang Señor posibleng wa pa makauli sa Leyte ang suspek apan posible usab nga ang abogado sa suspek mao ang nisuway pakig-areglo sa pamilya sa biktima.

Ang biktima una nang namahayag nga nag-uban sila sa iyang mga ig-agaw nga nag-inom sa usa ka bar sa Mango Avenue niadtong Lunes diin nisuway pakighigala kaniya ang mga suspek.

Apan dihang nangasilyas kini, giatangan siya sa tulo ug ang usa namugos kaniya pagpainom og bino sa baso nga iyaha usab girespetaran apan nalipong siya ug giguroy. Dihang nikisi-kisi siya gisukmag siya sa kutokuto ug nawad-an og panimuot.

Sunod niyang nabantayan bisan naglipong-lipong sakay na siya og taksi kauban ang tulo ka mga lalaki ug nawad-an na usab siya og panimuot. Sunod niyang pagmata, anaa na siya sud sa usa ka lawak ug gibanos-banosan siya paglugos sa mga suspek.

Lakip sa suspek ang usa ka tinun-an sa kursong hotel and restaurant management sa usa ka unibersidad dinhi sa dakbayan nga giingong basketball player. Ang laing usa mao si Peter Bendanillo, ang caretaker sa boarding house nga gidad-an sa biktima ug positibong gitumbok sa dalaga nga usa sa nilugos kaniya.

Samtang ang ikatulo, padayon pang giila sa kapolisan. Niadtong Miyerkules sa hapon nasang-at na ang kasong rape batok sa tulo.

Si Bendanillo kusganong mihimakak sa mga alegasyon batok kaniya ug gihatagan og kinse ka adlaw aron tubagon ang sumbong batok kaniya, samtang ang laing duha ka suspek ipaubos sa preliminary investigation human mapadad-an og summon.

Si Señor mirekomendar sa biktima nga mapaubos sa stress debriefing sa Department of Social Welfare and Development tungod kay ‘traumatized’ pa gihapon kini sa nahitabo. (Gikan sa The Freeman/EIM)