Opon nangandam na sa piyesta

CEBU, Philippines – Ang dakbayan sa Lapu-Lapu nipahigayon og kick-off celebration sa niagi’ng Biyernes sa gabii sa City Auditorium alang sa nagkaduol nga kapistahan sa Birhen sa Regla sunod buwan.

Liboan ka empleyado sa City Hall apil na niini ang mga job-order workers ilabi na ang mga konsehal sa siyudad ang nitambong.

Nitambong sab si Mayor Paz Radaza diin iya’ng gipahimangnuan ang mga trabahante nga magpadayon sa paghatag og maayo’ng serbisyo sa mga residente nga moadto sa ila’ng mga nagkadaiya’ng opisina.

"Sa ako na’ng giingon nga dili lang kutob ra sa pagsul-ob sa ato’ng mga colorful nga uniforms kun dili ato sab ihatag sa katawhan ang serbisyo nga makatagbaw kanila," matud ni Radaza. Sa niagi’ng buwan sa Agosto, gisaulog sa dakbayan ang una’ng anibersaryo sa branding niini isip "Historic Resort City".

"Let us also focus on making sure that we are able to sustain growth and progress," dugang nga pahimangno sa mayor sa katawhan.

Sa pagkakaron, giplano pa sa siyudad ang usa ka buwan nga kalihukan alang sa piyesta karong Nobiyembre 20 ug 21. - /GMR) (BANAT NEWS)