Martinez, Mondigo nag-uli
CEBU, Philippines – Nagkauli ang duha ka karaang politiko sa ika-upat nga distrito sa probinsiya sa Sugbo nga sila si Bogo City Mayor Celestino “Junie” Martinez ug kanhi mayor ug bokal Joven Mondigo Sr. human dul-an napulo ka tuig nga panag-atbang sa politika.
Ang anak ni Mondigo nga si Bokal Joven “Venjun” Mondigo Jr. ang mopapili sa pagka-mayor sa lungsod sa Medellin sunod eleksiyon ubos sa Liberal Party.
Gikalipay ni Martinez ingon man ni Gobernador Hilario Davide III ang pagbalik ni Mondigo sa grupo sanglit nakapasamot kini sa kalig-on sa partido sa ika-upat nga distrito.
Kagahapon gipahibawo ang mga lokal nga kandidato sa distrito lakip nila’ng kanhi bokal Jose Ribomapil Holganza Jr. ug Konsehal Horacio “Raci” Franco III sa Medellin sa pagkasakop sa hunta probinsiyal.
Wala pa’y kandidato ang LP sa pagka-kongresista.
Apan matud ni Mondigo nga iya’ng tabangan si Martinez kung modagan sa pagka-kongresista nga mao’y iya’ng posisyon niadtong 1987 hangtud 1998 diin iya’ng napanday ang Local Government Code of 1991.
Matud ni Mondigo nga saksi siya sa nahimo ni Martinez nga kalambuan sa distrito sanglit mayor siya sa Medellin niadto’ng panahona hangtud nahimo’ng sakop sa hunta probinsiyal.
Niadto’ng 2007 nibiya si Mondigo kang Martinez ug nagpapili sa pagkamayor sa Medellin ubos sa One Cebu Party apan napilde ni Mayor Ricky Ramirez. (BANAT NEWS)
- Latest