12 nadakpan tungod sa drugas

CEBU, Philippines - Dose ka mga tawo ang nadakpan, lakip niini ang duha ka wanted sa kasong murder sa tulo ka managlahing operasyon sa kapolisan dinhi sa Sugbo.

Nadakpan sa kapolisan sa dakbayan sa Lapu-Lapu si Baby "Ricardo" Berdin, 50, atol sa buy-bust operation diha sa sitio Kinalumsan, barangay Gun-ob ug nakuhaan og 10 ka gagmay’ng putos sa gituohang shabu ug laing duha ka medium size niini nga gibana-bana nga anaa sa P100 mil. Nabawi usab ang P600 nga halin sa ilegal nga kalihukan , usa ka .9mm pistol nga naay pito ka bala, usa ka blue nga motorsiklo (#6558-GG) ug drug paraphernalia.

Samtang nasikop sa security checkpoint si Nelson Igot, 46, taga  sitio Cambiohan, barangay Marigondon  diha sa sitio Suba-Panas, barangay Subabasbas  samtang kini nagbaligya og shabu sa maong dapit. Tulo ka medium size packs nga shabu ug laing 11 ka gagmay’ng pakete niini  nga gibanabanang mokantidad og P75 mil ang nakuha sa kapolisan.

Lima usab ka tawo ang nadakpan sa barangay Casili, sa Consolacion apan nakaeskapo ang ilang target nga si Marciano  Tabo-Tabo nga giingong notadong drug pusher sa lugar. Ang nadakpan mao sila si Hermie Logarta, 31, Reynante Soco, 36, Jeramil Pitogo,  Rene Impas Magno, 37, ug Arnel  Sugarol Ybale, 37. Matud pa nakabantay si Tabo-Tabo nga polis ang iyang katransaksyon ug mikaratel kini og dagan.

Nakuha ang usa ka dakong paketeng shabu nga 7.2 gramos ang gibug-aton ug mga airsoft rifles. Sa laing operasyon, duha ka wanted sa kasong murder ug laing tulo ka lalaki ang nadakpan sa usa ka police operation diha sa barangay Gaway-gaway, San Remigio nga miresulta usab sa pagkasakmit sa dul-an P200 mil nga shabu ug duha ka armas.

Ang mga nasikop naila nga si Lani Clarin Mendez, nga wanted sa kasong murder niadtong tuig 2013 ug gitumbok nga maoy number 1 nga drug personality sa maong lungsod, ug ang iyang kauban nga akusado nga si Lito Monteron, nga armado og KG9 submachine pistol ug .357 revolver.

Silang Marvin Mendez, igsoon ni Lani, Nonito Talisic ug iyang pag-umangkon nga si Joel Talisic giapil usab og dakop human naabtan nga nag-repack og shabu. Nakarekober ang kapolisan og duha ka dagko nga putos, tulo ka medium sized nga putos ug tulo ka pakete nga gidudahang shabu nga gibahig sa mga suspek nga gituohang mobalor og P177 mil. (Christell Fatima Tudtud, Romeo Limpangog ug Bryner Diaz/EIM)