Usa patay, 10 angol sa aksidente
CEBU, Philippines - Patay ang usa ka drayber sa motor human nga nabanggaan og laing motor dihang kalit lang ning miliko sa eskina sa barangay 8 sa lungsod sa Tuburan.
Gideklarar na nga dead on arrival sa Tuburan District Hospital si Renario Rome samtang angol sab ang nakabangga niya nga si Marlo Puerto Cose, 21, ug ang angkas niini nga si Jimboy Makas, 20, ug napagan ang estambay nga si Lydio Maxilom.
Base sa imbestigasyon sa kapolisan nga nagsunod og dump truck si Romeo ug si Cose apan pag-abot sa eskina sa barangay 8, kalit lang miliko si Romeo ug uwahi nang nabantayan ni Cose hinungdan sa pagsingki sa ilang mga motor. Nalagpot si Romeo ug nabunal sa karsada samtang si Cose nalagpot sab apan naigo niya si Maxilom nga nagbarog kilid sa dalan. Samtang pito ang naangol human ang traysikol nga ilang gisakyan nabangga sa likod nga ligid sa usa ka dumptruck sa barangay Flores, Catmon.
Ang naangol naila nga sila si Maximo Canque, 64, drayber; Isidro Bariga, 75; Lady Rosalyn Ares, 26; Ma. Daryl Recamadas, 24; Patrick Tapere, 17; May Ann Nuñeza, 22; ug si Arlene Abrigo, 37.
Samtang si Wilson Armenton, 44, natanggong sa buhatan sa kapolisan human sa disgrasya.
Matud pa nga si Canque nagdrayeb sa iyang traysikol apan kalit nawad-an siya og kontrol hinungdan nga nabangga sila sa dumptruck.
Ang mga biktima gidala sa Vicente Sotto Memorial Medical Center. (BANAT NEWS)
- Latest
