Mga tinun-an nalanag sa manok

CEBU, Philippines - Dili mominos sa napulo ka mga tinun-an sa usa ka pribadong tunghaan sa dakbayan sa Mandaue ang gituohan nga nalanag sa ilang gikaon nga manok sa usa ka kan-anan sa may north reclamation area Mandaue City.

Ang maong mga tinun-an gikatahong nakakaon sa pagkaon gikan sa usa ka fastfood chain (pangalan sa kan-anan gipugngan una sa Banat News) sa maong dapit.

Matud pa ni Virginia Juñio, iyaan sa usa sa mga tinun-an nga nahinabi sa Banat News nangaon ang iyang pag-umangkon ug mga classmates sa maong kan-anan human sa ilang usa ka exams.

Apan human sila nakakaon, naglain na ang lawas sa pag-umangkon ug nagsige na lang og suka maong nipauli sa ilaha nga nangluspad ug luya ang lawas hinungdan nga ilang gidala sa tambalanan.

Didto sa maong tambalanan nag-abot ang iyang pag-umangkon ug ang ubang mga tinun-an nga gikan nakakaon sa maong kan-anan nianang adlawa.  Si Dr. Dominga Obenza sa iyang bahin sa Mandaue City Health Department nibutyag sa Banat News mipadala na og sanitary inspection team sa maong kan-anan aron pagsusi sa reklamo.

Samtang ang HR officer sa maong kan-anan nga si Niño Aguilar niangkon nga aduna siya’y nadawat nga reklamo sa miaging adlaw, apan nagpaabot pa sila sa resulta sa eksaminasyon aron mahibaw-an unsay hinungdan sa pagkalanag sa maong mga tinun-an.

Dugang pa ni Aguilar nga bukas sila sa imbestigasyon apan sa pagkakaron unahon nila pag-atiman ang mga estudyante diha sa tambalanan.  (BANAT NEWS)