JVR wa pa’y bise

CEBU, Philippines - Nibalibad pa ang mga giplanohan ni Talisay City Mayor Johnny V. de los Reyes nga ipares isip bise mayor sa umaabot eleksiyon.

Si Konsehal Valeriano Ylanan nagtinguha nga humanon ang iya’ng termino isip konsehal samtang si Konsehal Dennis Basillote gusto’ng magpapili isip board member sa una’ng distrito.

Gumikan sa kalamboan, nitumaw ang report nga ang posible’ng mapares ni JVR mao ang iya’ng anak nga City Administrator John Yre de los Reyes.

Apan dali kini’ng gihimakak sa mayor tungod kay matud niya wala’y kamatuoran ang report sanglit mahimo ra’ng modagan nga wala’y bise mayor.

Malaumon gihapon ang mayor nga mosugot si Ylanan sa umaabot nga adlaw tungod kay mao gyud kini ang iya’ng gusto’ng mapares samtang duna pa sila’y plantsahon nga mga butang.

Si Ylanan niingon nga iya pa’ng gihinuktukan ug konsultahon ang mga lider ug sakop sa pamilya kun dawaton ba niya ang tanyag.

Sunod semana magsugod na ang pagduso sa certificate of candidacy sa mga mokandidato sa 2016 elections. (BANAT NEWS)